Bıýdjet kiristeri 73 mlrd teńgege asyra oryndaldy - Álıhan Smaıylov

NUR-SULTAN. QazAqparat - 2019 jyldyń qańtar-mamyr aılarynda respýblıkalyq bıýdjet kiristeri 2 trln 783 mlrd teńgeni qurady. Osylaısha jospar 2,7% nemese 73 mlrd teńgege asyra oryndaldy, dep habarlaıdy QazAqparat tilshisi.

Bul týraly QR Premer-Mınıstriniń birinshi orynbasary - Qarjy mınıstri Álıhan Smaıylov Úkimet otyrysynda aıtty.

«Asyra oryndaý somasy negizinen salyq arqyly jınaldy. Oǵan eksporttyq taýar bajy mólsherlemeleriniń jáne birqatar salalardaǵy taýarlar óndirisi men qyzmetterdiń kóleminiń ósýi syndy negizgi faktorlar yqpal etti. Alaıda korporatıvtik tabys salyǵy (-17 mlrd teńge) jáne ımportqa salynatyn qosylǵan qun salyǵy (-38 mlrd teńge) boıynsha jospar oryndalmady», - dedi mınıstr.

Ásirese ekinshi deńgeıli bankter tabysynyń áli de tómendeýi Korporatıvtik tabys salyǵynyń tolyq oryndalmaýyna sebep bolǵan. Birqatar iri salyq tóleýshilerden túsimderdiń azaıýyna baılanysty ımportqa salynatyn QQS oryndalmady.

«Kiristerdi ákimshilendirýde joǵary zań buzý qaýpi bar salyq tóleýshilerge basa nazar aýdaryldy. Bul jumys táýekelderdi basqarý júıesi aıasynda kameralyq baqylaý arqyly júrgizildi. Kameralyq baqylaý boıynsha jiberiletin habarlamalar sany 2 esege ósti. Nátıjesinde salyqtardy óndirip alý koeffıtsıenti 86% ulǵaıdy. Bıýdjetke qosymsha 31 mlrd teńge tústi», - dep túsindirdi Á. Smaıylov.

Onyń aıtýynsha, jergilikti bıýdjetterdiń óz kiristeri 113,4% nemese 120 mlrd teńgege artyǵymen oryndalyp, 1 trln 17 mlrd teńgeni quraǵan.