Bıýdjet qarjysyn jymqyrǵan Dossor mektep-ınternatynyń dırektory sottaldy

ATYRAÝ. QazAqparat - Atyraý oblysyndaǵy Dossor mektep-ınternatynyń dırektory bıýdjet qarjysyn jymqyrdy dep aıyptalyp otyr, dep habarlaıdy QazAqparat Sybaılas jemqorlyqqa qarsy qyzmetke silteme jasap.

Atyraý oblystyq sybaılas jemqorlyqqa qarsy qyzmeti Sháripov atyndaǵy Dossor mektep-ınternatynyń dırektory B.Buırasheva, sharýashylyq máseleleri jónindegi dırektor orynbasary G.Kúbıeva men sol memlekettik mekemeniń bas esepshisi B.Faızýllınaǵa qatysty sotqa deıingi tergeýdi aıaqtady.

«Olar bıýdjet qarajatyn jymqyrdy degen kúdikke ilindi. Olar qyzmetkerlerdiń shotyna artyq mólsherde jalaqy aýdaryp kelgen. Keıinnen sol qarajatty jınap alyp, ózderiniń jeke qajetine jumsaǵan. Sonymen qatar, B.Buırasheva qyzmettik ókilettigin asyra paıdalana otyryp, «QAJ» jáne «Májenov» jeke kásipkerlerimen generator jáne jylytý qazandyǵyn jetkizý jóninde kelisim jasaǵan. Tehnıkalyq sıpattamaǵa saı kelmeıtin jáne tolyq emes taýarlardy qabyldaǵan. Kelgen shyǵyn - 3,5 mıllıon teńge» delingen habarlamada

12 qarashada Maqat aýdandyq sotymen B.Buırashevaǵa - 1 jyl, G.Kúbıevaǵa - 2 jyl jáne B.Faızýllınaǵa 1 jyl bas bostandyǵyn shekteý jazasy taǵaıyndaldy.

Bul tulǵalar memlekettik qyzmette laýazym atqarý quqyǵynan ómir boıyna aıyryldy.