Bıýdjet qarjysyn ıgere almaǵan mınıstrlikter anyqtaldy

NUR-SULTAN. QazAqparat – Ótken jyly respýblıkalyq bıýdjetten bólingen qarajatty 5 mınıstrlik tolyq ıgere almady. Bul týraly Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memlekettik bıýdjettiń shyǵystary 98,1, respýblıkalyq bıýdjettiń shyǵystary – 98,3, jergilikti bıýdjetterdiń shyǵystary 99,1 paıyzǵa atqaryldy. Respýblıkalyq bıýdjet boıynsha 14 trln 234 mlrd teńgege somasyna shyǵystar júrgizildi. Oryndalmaý 241 mlrd teńgeni qurady. Onyń ishinde 224 mlrd teńge - bul Úkimet rezervi boıynsha únemdelgen aqsha jáne basqa shyǵystar boıynsha únem. Igerilmeý somasy - 15 mlrd teńge», - dedi mınıstr.

Onyń atýynsha, ıgerilmegen qarajattyń neǵurlym iri somalary Іshki ister mınıstrligi, Bilim jáne ǵylym mınıstrligi, Tótenshe jaǵdaılar mınıstrligi, Ádilet mınıstrligi jáne Tsıfrlyq damý, ınnovatsııalar jáne aeroǵarysh ónerkásibi mınıstrliginde qalyptasty.

«Igerilmeýdiń negizgi sebepteri: ónim berýshilerdiń shart talaptaryn buzýy; tólem jónindegi qujattardyń uzaq kelisýi; oryndalǵan jumystar aktilerin usynbaý; naqty kórsetilgen qyzmetter kólemi, oryndalǵan jumystar, sot talqylaýlary úshin aqy tóleý», - dedi ol.

Sonymen qatar Erulan Jamaýbaev Memleket basshysynyń memlekettik qoldaý sharalarynyń tıimdiligine baǵalaý júrgizý jónindegi tapsyrmasyna sáıkes mınıstrlik tıisti Ádisteme men aqparattyq júıeni ázirlegenin atap ótti.

«Qazirgi tańda 2015-2019 jyldar aralyǵynda kórsetilgen memlekettik qoldaýdyń 67 sharasy boıynsha aldyn ala derekter bar. Bıyl tıimdilikti baǵalaýmen qarjylyq qoldaýdyń barlyq sharalary qamtylady. Onyń nátıjeleri odan ári bıýdjettiń sapasyn joǵarylatý úshin paıdalanylady», - dedi ol.