Bıýdjet qarjysy ýaqtyly ıgerilip, jol sapaly salynýy kerek – BQO ákimi

ORAL. QazAqparat – Bıyl Batys Qazaqstanda oblystyq jáne aýdandyq mańyzy bar 330-dan astam shaqyrym jol qurylysyna 30 mlrd teńge qaralyp otyr. Bul týraly oblys ákimi Ǵalı Esqalıev merdiger uıym basshylarymen jáne tehnıkalyq qadaǵalaý salasy ókilderimen kezdesýde málim etti, dep habarlaıdy QazAqparat tilshisi.

Oblys basshysynyń aıtýynsha, buryn óńirge jergilikti joldarǵa mundaı kólemdegi qarjy bólinbegen.

«Bizdiń maqsatymyz – bıýdjet qarajatyn ýaqtyly ıgerip, joldy sapaly salý. Bıyl karantınge baılanysty memlekettik satyp alý konkýrstaryn utqandardyń 90 paıyzdan astamy – jergilikti kompanııalar. Sondyqtan basqa óńirlerden kelip, jumys istep, ketip qalatyndar joqqa jaqyn. Sol sebepti jol qurylysyn erteń uıalmaıtyndaı deńgeıde júrgizý qajet. Áýeli jobalyq-smetalyq qujattamany muqııat daıyndaý kerek. Ol úshin merdigerler jobalaýshylarmen aptasyna bir ret kezdesip, basy artyq nárseni alyp tastap, qurylys jobasyn erte pysyqtap alǵany jón. Sonymen qatar qurylys kompanııalaryna ákimshilik kedergi jasaýǵa, túrli aıla-sharǵymen bopsalaýǵa jol berilmeýi tıis. Bul másele de qatań qadaǵalanady. Eń bastysy, sapa kerek», dedi Ǵ.Esqalıev.

Merdiger uıymdar tarapynan memlekettik organdar qyzmetkerleriniń qysym jasaıtyny jóninde shaǵymdar túsetinin aıtqan oblys ákimi sondaı-aq qurylys materıaldaryna taldaý júrgizetin zerthanalardyń kóbeıip ketkenin, solardyń ishinde jaqsy mamandary bar úsh-tórteýin tańdaý qajettigin jetkizdi.

Jıynǵa qatysqan QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Rýstam Aqmyrzaev jol qurylysy salasynda sybaılas jemqorlyq qylmysyna jol bermeý qajettigine nazar aýdardy.

«Sońǵy bes jylda avtokólik joldaryn salý, qaıta qurý men kútip ustaýǵa respýblıkalyq bıýdjetten 1,8 trln qarjy bólingen. Memlekettik qoldaý sharalaryna qaramastan, qurylys jobalary oıdaǵydaı júzege aspaı otyr. Bıýdjet qarajatyn jymqyryp, sybaılas jemqorlyqqa barǵan mamandar áreketi áshkerelenýde. Bıyl «Sapaly jol – adaldyq alańy» jobasy aıasynda departament qyzmetkerleri «Jol aktıvteri ulttyq sapa ortalyǵy» RMK BQO fılıalymen birlesip, jeti márte monıtorıng júrgizdi. Sonyń nátıjesinde memlekettik mekemeler men merdiger kompanııalardyń jaýapsyzdyǵynan ketken kemshilikter anyqtaldy. Joldyń sapaly salynýyna tapsyrys berýshi memlekettik mekeme ǵana emes, merdiger kompanııa, tehnıkalyq qadaǵalaýshy, sol istiń basy-qasynda júrgen basshylar men qurylysshylarǵa deıin jaýapty,» dedi R.Aqmyrzaev.

Eske sala keteıik, budan buryn BQO-da qandaı kompanııalardyń joldy sapasyz salatynyn jazǵan bolatynbyz.