Bıýdjet qarajatynyń tıimsiz jumsalýy eki esege kóbeıdi - mınıstr Sultanov
«Rasynda qarajattyń tıimsiz jumsalý somasy 2016 jylmen salystyrǵanda eki esege kóbeıdi. Osy somaǵa kiretin kórsetkishterdiń bireýi tómendese (ıgerilmeý somasy eki esege azaıdy), ekinshisi ulǵaıyp otyr (syrtqy jáne ishki aýdıt tekserýleri kezinde anyqtalǵan zań buzýshylyqtar). Qarjylyq buzýshylyqtyń 86 paıyzy býhgalterlik jáne qarjylyq esepterdi júrgizýdegi zańnamanyń buzylýyna tıesili. Bul másele bir jaǵynan, osy mamandardyń biliktiligin arttyrý, ekinshiden, olardy mindetti túrde kásibı sertıfıkattaý arqyly ǵana sheshiledi dep oılaımyz», - dep atap ótti mınıstr.
Budan bólek ol jyl saıyn qozǵalatyn problemanyń biri - ol kvazımemlekettik sýbektilerdiń shottaryndaǵy qaldyqtarǵa qatysty ekenin atap ótti.
«Ótken jyly bıýdjettik zańnamaǵa tolyqtyrýlarǵa sáıkes, osy sýbektilerdiń shottarynda qalyptasqan qaldyqtar únemdeýge jatqan jaǵdaıda, ári qaraı paıdalanýǵa múmkindikteri bar. Biraq, bul norma máseleni túbirli sheshpeı otyr. Byltyrǵy Bıýdjet kodeksine engizilgen ózgertýlerge sáıkes, endi kvazımemlekettik sýbektilerge qarajatty bólý qarjy-ekonomıkalyq negizdemede anyqtalǵan bıýdjettik ınvestıtsııalardy júzege asyrý merzimderi boıynsha atqarylady. Qazirgi kezde bıýdjet rásimderin jetildirý tobynyń jumysynda kóp jyldar boıy paıdalanylmaı, kvazımemlekettik sýbektileri shottarynda jatqan qarajattardy bıýdjet kirisine qaıtarý normasy talqylanýda», - dep túıdi Baqyt Sultanov.
Budan buryn habarlanǵandaı, Senattyń Qarjy jáne bıýdjet komıtetiniń keńeıtilgen otyrysynda kvazımemlekettik sektordyń sýbektileri ıgerilmegen qarjyny bıýdjetke qaıtarýǵa mindetteletini málim boldy.