Bıýdjet qarajatyn ıgermegender jaýapkershilikke tartylady - Asqar Mamın
«Bıýdjet bóligine kelsek, bıylǵy jospar boıynsha ótken jylmen salystyrǵanda asyra oryndaý baıqalyp otyr. Degenmen, bıýdjettik baǵdarlamalardyń ákimshileri qarajatty ıgermegen. Bıýdjet qarajatynyń ıgerilmeýine jol bergen tulǵalardy jaýapqa tartý boıynsha tıisti sheshimder qabyldanady», - dedi Úkimet basshysy.
Osy rette Asqar Mamın mınıstrler men ákimderdiń nazaryn jyl sońyna deıin 1,5 aı ǵana ýaqyt qalǵanyna aýdardy.
«Sol sebepti nysanaly kórsetkishterdiń oryndalýyn qamtamasyz etý maqsatynda barlyq sharalardy uıymdastyrý kerek. Jalpy ekonomıkanyń sapaly ári ornyqty ósýi úshin ınvestıtsııa tartý, jumys oryndaryn qurý, ónimdilikti jaqsartý jáne azamattardyń ál-aýqatyn arttyrýǵa bárimiz basa nazar aýdarýymyz qajet», - dedi Asqar Mamın.
Aıta keteıik, otyrys barysynda 10 aıdaǵy memlekettik bıýdjettiń atqarylýy jaıynda baıandaǵan QR Premer-Mınıstriniń birinshi orynbasary - Qarjy mınıstri Álıhan Smaıylov birqatar mınıstrlik pen ákimdik respýblıkalyq bıýdjetten bólingen qarjyny ıgere almaı otyrǵanyn aıtyp, Úkimet basshysynan qarajatty ıgere almaǵan bıýdjettik baǵdarlama jetekshilerin jaýapqa tartýdy suraǵan bolatyn.