Bıýdjet ǵımarattarynyń 60 paıyzdan astamy energııa únemdeýge beıimdelmegen

ASTANA. QazAqparat – Elektr energetıkasyn damytý jáne energııa únemdeý ınstıtýtynyń basshysy Baýyrjan Smaǵulov elimizdegi bıýdjettik sektor ǵımarattarynyń energııany paıdalanýyna qatysty taldaý nátıjesimen tanystyrdy, dep habarlaıdy QazAqparat tilshisi.

«Bizdiń ınstıtýt memlekettik energetıkalyq reestrdiń derekterine súıene otyryp bıýdjettik sektordyń 16 myńǵa jýyq ǵımaratyna taldaý jasady. Onyń nátıjesine sáıkes ǵımarattardyń 60%-dan astamy energııany tıimdi qoldaný boıynsha eń tómengi «E» klasyna jatady. Aıta ketsek, «E» klasyna jatatyn ǵımarattar energoresýrstardy 50%-ǵa artyq tutynady. Memlekettik energetıka reestrine 16 myńnan astam bıýdjettik uıym kiredi. Jalpy energııa tutyný - 5,2 mln Gkal jáne saǵatyna - 2 mln MVt quraıdy. Memlekettik energetıka reestrine kiretin uıymdarda barlyǵy 2,2 mln jaryq núktesi ornatylǵan, onyń tek 50% - jaryqdıodty», - dedi Baýyrjan Smaǵulov Astanada ótip jatqan IV halyqaralyq energııa únemdeý forýmynda.

Onyń málimetinshe, bıýdjettik sektordyń energııa únemdeýdegi jalpy áleýeti - jylyna 3 mlrd teńge.

«Bıýdjettik sektorǵa qatysty qoldanystaǵy zańnamaǵa jańa túzetýler engizildi. Atap aıtqanda, energııa tutyný normatıvteri jáne olardyń saqtalýyna monıtorıng jasalady. Sondaı-aq, jergilikti atqarýshy organdardy úsh jyldyq jol kartasyn qabyldaý jáne iske asyrý quzyretine mindetteıtin túzetýler qabyldandy. Búgingi forýmǵa otandyq energııa únemdeý quraldaryn óndirýshiler men jetkizýshilerdiń ókilderi, sonymen qatar jergilikti atqarýshy organ ókilderi qatysyp otyr. Osy múmkindikti paıdalana otyryp, bıýdjettik sektorda energııany tıimdi tutyný boıynsha birlesip jumys isteýge shaqyramyn», - dedi ol.

Buǵan deıin ınstıtýt basshysy 2023 jyly memlekettik energetıkalyq reestr sýbektileriniń 40 myńǵa jetetinin habarlaǵan edi.

Aıta keteıik, Astanada IV halyqaralyq energııa únemdeý forýmy ótip jatyr.