Byltyrǵy referendým jáne saılaý naýqandary birligimizdiń bekem ekenin kórsetti - Prezıdent

ASTANA. QazAqparat – Elimizdegi reformalar memlekettilikti nyǵaıtýǵa, azamattardyń ál-aýqatyn qamtamasyz etýge baǵyttalǵan. Bul týraly búgin elordada Qazaqstan halqy Assambleıasynyń sessııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

Prezıdenttiń aıtýynsha, Qazaqstan óziniń geosaıası tóńireginde tereń transformatsııalardy júzege asyryp jatqan birden-bir memleketke aınaldy. Bul baǵyttaǵy qadamdar ońaı bolmaıtyny anyq, biraq osy qarqynymyzdy báseńdetýge bolmaıdy.

Osy oraıda Memleket basshysy el múddesi bárinen joǵary turǵanyn atap ótti. Sondyqtan elimizdegi reformalar, eń aldymen, memlekettilikti nyǵaıtýǵa, azamattardyń ál-aýqatyn qamtamasyz etýge baǵyttalǵan.

«Byltyrǵy referendým jáne saılaý naýqandary birligimizdiń bekem ekenin aıqyn kórsetti, sondaı-aq memleket pen qoǵamnyń ózara senimin nyǵaıtty, barsha azamattardyń el bolashaǵyna qatysty ustanymy bir ekenin tanytty», - dedi Qasym-Jomart Toqaev.

Budan buryn habarlanǵandaı, búgingi sessııa barysynda Prezıdent QHA-nyń jańa syılyqtary men ordenin bekitýdi usyndy.

Memleket basshysy tatýlyq pen kelisim halqymyzdyń ómir saltyna aınalýy tıis ekenin aıtty.