Byltyrdan beri Qytaıda turyp qalǵan 1300 konteıner elge qaraı jolǵa shyqty

NUR-SULTAN. QazAqparat - Byltyrdan beri Qytaı aýmaǵynda turyp qalǵan qazaqstandyq 1300-ge jýyq konteıner Qazaqstanǵa kelip, ári qaraı bıznesmenderdiń kelisimsharttyq mindettemelerine sáıkes basqa elderge bet aldy, dep habarlaıdy QazAqparat ulttyq kásipkerler palatasyna silteme jasap.

Qazirgi kezde Qytaı 45 konteınerdi Lıanıýngan portynan shyǵarý jónindegi josparǵa qosty, taǵy 96 konteıner Qazaqstan shekarasyna jol tartty.

«Subaru Kazakhstan» JShS konteınerleri Qytaı aýmaǵynda 5 aı boıy turyp qalǵan. Jaqyn kúnderi konteınerler Qazaqstanǵa jetti. Júktiń keshigýi kompanııa úshin qosymsha shyǵyn boldy.

«Bizdiń kompanııamyz sapaly bólshekterdi Japonııadan satyp alady. Qytaımen shekarada bólshekterdiń turyp qalýyna baılanysty qarjylaı shyǵyn ósti. Bul jaıt tehnıkanyń bastapqy qunyna teris áser etedi. Sonymen qatar, biz Subaru-dyń resmı dıstrıbıýtorymyz jáne zaýyttan kepildik beremiz. Demek, qosalqy bólshekterdi jetkizýdegi kez kelgen kidiris klıentterimizdi kútýge, al bizdi olardyń aldyndaǵy mindettemelerimizdi buzýǵa májbúr etedi», – dedi «Subaru Kazakhstan» JShS dırektory Aqylbek Anarbaev.

«Atameken» UKP mamandarynyń aıtýynsha, Qytaıdan júk tıelgen konteınerler elge kele jatyr. Ulttyq palata osy turyp qalǵan júkter týraly derekterdi 2021-2022 jyldar aralyǵynda salalyq vedomstvolar men «Qazaqstan temir joly» kompanııasyna habarlaǵan.

«Qazir biz oń dınamıkany baıqap otyrmyz. Ulttyq palata 1342 konteıner týraly derektermen taǵy bir tizimdi jiberdi. Sol tizimdegi turyp qalý merzimi tym uzaryp ketken. Shekarada 1-den 4-ke deıin konteıneri bar shaǵyn jáne orta bıznes sýbektileriniń júkteri 6-7 aıdan astam ýaqyt turyp qalǵan. Bul tizim boıynsha ilgerileýdi kórip otyrmyz», – dep atap ótti «Atameken» QR UKP tóralqa tóraǵasy Raıymbek Batalov.

UKP 2022 jyly Úkimetpen birlesip, konteınerlerdi jóneltýdi jedeldetý mehanızmin ázirledi.

Palata turyp qalǵan konteınerler týraly derekterdi QTJ, Indýstrııa jáne ınfraqurylymdyq damý mınıstrligi jáne Syrtqy ister mınıstrligine jiberedi.

Memlekettik organdar Qytaı tarapymen qozǵalys josparyna Qazaqstan konteınerlerin engizý múmkindigin naqty pysyqtap jatyr.

Bıznesmenderden Qytaıda turyp qalǵan konteınerlerge qatysty shaǵymdar 2020 jyldan bastap túsip jatyr.