Byltyr jol apatynan kóz jumǵan balalar sany 24% artqan

ASTANA. QazAqparat – Byltyr jol apatyndaǵy bala ólimi 24% artqan, dep habarlaıdy QazAqparat tilshisi.

Mınıstrliktiń QazAqparat saýalyna joldaǵan jaýabynda 2022 jyly balalardyń qatysýymen 3 385 jol-kólik oqıǵasy tirkelgeni aıtylǵan.

Bul 2021 jylmen salystyrǵanda 15% joǵary (2021 jyly-2 939) kórinedi.

Osy oqıǵalardyń saldarynan qaza tapqan balalar sany - 24% (2021 jyly - 200, 2022 jyly – 248), al jaralanǵandar sany - 20% (2021 jyly-3 333, 2022 jyly-3 989) ósken.

Vedomstvonyń deregine súıensek, 1-4 synyp oqýshylaryna jol erejesi «Dúnıetaný», «Beıneleý óneri», «Eńbekke baýlý» pánderi arqyly oqytylady.

Atap aıtqanda, pánderdiń úlgilik baǵdarlamalarynda «Baǵdarsham», «Men jaıaý júrginshimin», «Baǵdarsham jáne jol belgileri», «Joldy qaýipsiz kesip ótý», «Jaıaý júrginshiler ótkeli» sııaqty taqyryptar qamtylǵan.

«5-9 synyptarǵa arnalǵan «Jahandyq quzyrettilikter» oqý kýrsynyń úlgilik oqý baǵdarlamasynda «Ómir súrý qaýipsizdigi» bóliminde jol qozǵalysy erejeleri oqytylady. 10-11 synyptarǵa arnalǵan «Alǵashqy áskerı jáne tehnologııalyq daıyndyq» oqý pániniń úlgilik baǵdarlamasynda jol qozǵalysy erejeleri «Tehnologııalyq daıyndyq» bóliminde qamtylǵan», - dep jazady mınıstrlik mamandary.

Osylaısha «Jol qozǵalysy erejeleri» 1-4 synyptarda 6 saǵattan, 5-8 synyptarda 10 saǵattan júrgiziledi.