Byltyr jeke sot oryndaýshylar kásipkerlerdiń paıdasyna 185 mlrd teńge óndirgen

ASTANA. QazAqparat – Ótken jyly jeke sot oryndaýshylar memleket kirisine - 31 mlrd, al bıznestiń paıdasyna 185 mlrd teńge óndirdi. Bul týraly Respýblıkalyq jeke sot oryndaýshylar palatasynyń tóraǵasy Aıdos Imanbaev aıtty, dep habarlaıdy QazAqparat tilshisi.

«Byltyr sot oryndaýshylardyń óndirisinde 7,8 mln atqarýshylyq qujat boldy. Bul 2021 jylmen salystyrǵanda 1,1 mln qujatqa artyq. 2021 jyly 2,3 mln is tolyq oryndalsa, byltyr 2,6 mln is atqaryldy. Memleket kirisine 31 mlrd, azamattardyń jalaqysyna – 4 mlrd teńge, bıznestiń paıdasyna 185 mlrd teńge óndirdi», - dedi Aıdos Imanbaev Ortalyq kommýnıkatsııalar qyzmetinde ótken brıfıngide.

Palata tóraǵasy jeke sot oryndaýshylarǵa qatysty azamattar tarapynan aıtylyp jatatyn talap-shaǵymdarǵa da toqtaldy.

«2021 jylmen salystyrǵanda byltyr jeke sot oryndaýshylarǵa qatysty shaǵymdar sany 33%-ǵa azaıǵan. Atap aıtqanda, jeke sot oryndaýshylardyń áreketine baılanysty 4 217 aryz túsip, onyń 624-i qanaǵattandyryldy. Joǵarǵy Sot sot oryndaýshylardyń is-áreketterin daýlaıtyn isterdi qorytyndylap, ótken jylmen salystyrǵanda talap qoıý kórsetkishi 8%-ǵa tómendegenin atap ótti», - dep málimdedi Aıdos Imanbaev.