Byltyr úılerinde tonǵan rıdderlikterge JEO 160 mln teńge qaıtardy

ÓSKEMEN. QazAqparat – Shyǵys Qazaqstan oblysy Rıdder qalasynyń turǵyndaryna jylý aqysyn artyq tólegeni úshin 160 mln teńge qaıtaryldy, dep habarlaıdy QazAqparat tilshisi.

Byltyrǵy jylytý maýsymynda Rıdder halqy jylý elektr ortalyǵynda jıi oryn alǵan apat saldarynan qaıta-qaıta jylýsyz qalǵan bolatyn. Soǵan qaramastan turǵyndar jylý aqysyn úzbeı tólep keldi.

Tabıǵı monopolııalardy retteý komıtetiniń ShQO boıynsha departamenti 2022-2023 jylǵy jylytý maýsymynyń korytyndysyna sáıkes jylýmen jabdyqtaý qyzmetiniń qunyn qaıta eseptedi. Nátıjesinde «Rıdder JEO» AQ óz tutynýshylaryna 292 mln teńgeni artyq tóletkeni anyqtaldy.

«Qazirgi ýaqytta Rıdder qalasynyń turǵyndaryna 160 mln teńge qaıtaryldy. Qalǵan 132 mln aldaǵy jylytý maýsymynan 2023 jyldyń sońyna deıin óteledi. Búginde JEO-da jóndeý jumystary júrgizilip jatyr. Osyǵan baılanysty búkil qala boıynsha mamyr aıynan beri ystyq sý óshirilgen. Sol úshin halyq jaz boıy ortalyqqa esh aqsha tólegen joq», - dep habarlady departamentten.