Byltyr ulttyq parkterge 2 mln-nan astam adam barǵan

ASTANA. QazAqparat – Byltyr erekshe qorǵalatyn tabıǵı aýmaqtarda ereje buzǵan 655 adam ákimshilik jaýapqa tartyldy. Bul týraly BAQ ókilderiniń qatysýymen ótken brıfıngide Ekologııa mınıstrliginiń Orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵambaev aıtty, dep habarlaıdy QazAqparat tilshisi.

«Byltyr erekshe qorǵalatyn tabıǵı aýmaqta baqylaý-ınspektsııalyq qyzmet sheńberinde 2 992 reıd júrgizilip 44 quqyq buzýshylyq anyqtaldy. Nátıjesinde 655 adamǵa 640 mln teńge kóleminde aıyppul salyndy», - dep málim etti Danııar Turǵambaev.

Sonymen qatar, onyń aıtýynsha, ótken jyly ulttyq parkterge kelýshiler sany 2 mln asty. Bul 2021 jylmen salystyrǵanda 25%-ǵa kóp.

«Erekshe qorǵalatyn tabıǵı aýmaqtardy paıdalanǵany úshin tólemaqy jınaýdyń ashyqtyǵyn qamtamasyz etý jáne sybaılas jemqorlyq táýekelderin azaıtý maqsatynda ulttyq parkterdiń baqylaý-ótkizý pýnktterin avtomattandyrý boıynsha jumystar júrgizilýde. «Kólsaı kólderi» ulttyq parkinde «Kólsaı» baqylaý-ótkizý pýnkti avtomattandyryldy, sondaı-aq tólemderdi qabyldaýdyń ıntegratsııalanǵan júıesimen jańa saıt ázirlendi. Atalǵan jumystyń qorytyndysy boıynsha osy tásildi barlyq ulttyq parkterge engizý múmkindigi qarastyrylýda. Bıyl Іle-Alataýy, Sharyn jáne Baıanaýyl ulttyq parkterinde baqylaý-ótkizý pýnktterin avtomattandyrý josparlanýda», - dep bólisti komıtet tóraǵasynyń orynbasary.

Buǵan deıin habarlaǵanymyzdaı, Qazaqstannyń ulttyq parkterinde múgedektigi bar adamdar úshin qolaıly jaǵdaı jasalady.