Byltyr Túrkııanyń Qazaqstanǵa tikeleı ınvestıtsııasy rekordtyq kórsetkishke jetken

ANKARA. QazAqparat - Byltyr Túrkııanyń tikeleı ınvestıtsııasy rekordtyq kórsetkishke jetip, 680 mıllıon dollar boldy. Bul týraly Prezıdent Qasym-Jomart Toqaev Qazaqstan men Túrkııa bıznes ókilderiniń basqosýynda aıtty, dep habarlaıdy QazAqparat.

«Sońǵy 16 jylda túrik baýyrlarymyz Qazaqstanǵa 4,2 mıllıard dollardan astam tikeleı ınvestıtsııa quıdy. Pandemııa kezinde álem boıynsha shet el ınvestıtsııasynyń kólemi kúrt azaıǵany belgili. Soǵan qaramastan, Túrkııadan bizdiń elge keletin ınvestıtsııa azaıǵan joq. Muny árıne, qýantarlyq jaıt dep aıtýǵa bolady. Bul – túrik aǵaıyndardyń bizdiń elimizge degen joǵary seniminiń kórinisi. Byltyr Túrkııanyń tikeleı ınvestıtsııasy rekordtyq kórsetkishke jetip, 680 mıllıon dollar boldy. Qazir Qazaqstanda túrik kapıtaly bar 4 myńǵa jýyq kompanııa tabysty jumys istep jatyr», – dedi Memleket basshysy.