Byltyr tabıǵı monopolııalardy retteý salasyndaǵy ınvestıtsııa 209 mlrd. teńgeni qurady - TMRA
13:40, 18 Naýryz 2013
ASTANA. 18 naýryz. QazAqparat - Byltyr tabıǵı monopolııalardy retteý salasyndaǵy ınvestıtsııa 209 mlrd. teńgeni qurady. Búgin Parlament Májilisindegi Úkimet saǵatynda QR Tabıǵı monopolııalardy retteý agenttiginiń tóraǵasy Murat Ospanov osylaı málim etti.
Agenttik qyzmetiniń strategııalyq baǵytynyń biri ınvestıtsııa ósimin qamtamasyz etý bolyp tabylady. Osyǵan baılanysty 2012 jyldyń qorytyndysy boıynsha ınvestıtsııa shamamen 209 mlrd. teńgeni quraǵan. Bul ótken kezeńnen 46 paıyzǵa nemese 66 mlrd. teńgege artyq kórsetkish bolyp otyr.
«Turǵyn úı-kommýnaldyq sharýashylyq salasyndaǵy bazalyq monopolıster ótken jyly shamamen 28 mlrd. teńge shamasynda ınvestıtsııalaý baǵdarlamasyn iske asyrdy. Nátıjesinde, 840 transformator, 3751 shaqyrym elektr jelisin, 34 shaqyrym jylý jelisin, 21 týrbına men 29 qazandyq jańǵyrtylyp, kúrdeli jóndeýden ótkizgen», - deıdi Murat Ospanov.