Byltyr SQO turǵyndary aılyǵynyń teń jartysyn tamaqqa jumsaǵan

PETROPAVL. QazAqparat – Soltústik Qazaqstan oblysynda ulttyq statıstıka bıýrosynyń departamenti turǵyndardyń byltyrǵy shyǵysyn zerttep, halyqtyń jan basyna shaqqandaǵy aılyq ortasha shyǵysy 88,9 myń teńge bolǵanyn anyqtady, dep habarlaıdy QazAqparat tilshisi.

QR Ulttyq statıstıka bıýrosynyń SQO boıynsha departamenti baspasóz qyzmetiniń málimetinshe, halyqtyń aı saıynǵy aqshalaı shyǵysy 2021 jylmen salystyrǵanda 16,1% artqan.

Halyqtyń tabysynyń eń úlken úlesin - 89,5% tutyný shyǵysy alǵan.

Qalǵanyn turǵyndar materıaldyq kómekke, alıment, kredıt pen qaryzdy óteýge, salyqtarǵa jumsaǵan.

Otbasylyq bıýdjettiń eń shyǵyndy bóligi, ıaǵnı 50,1% azyq-túlik taýarlaryna jumsalady.

Azyq-túlik emes taýarlardy satyp alý shyǵysy – 34%, qyzmetter tólemaqysy 15,9% alyp otyr.

SQO turǵyndarynyń tamaqtaný qurylymynda et jáne et ónimderin satyp alýǵa ketken shyǵysy 29,4%, ekinshi orynda 16,7% nan jáne jarma ónimderin satyp alý tur.

Qala jáne aýyl turǵyndarynyń azyq-túlik taýarlaryn satyp alý qurylymy ózgeshe.

Qalalyqtardyń et jáne et ónimderin, sút jáne sút ónimderin satyp alýǵa jumsalatyn shyǵystar úlesi joǵary, al nan men jarma ónimderine, qant pen kondıter ónimderine jumsalatyn qarajat úlesi tómen.

Azyq-túlik emes taýarlar tobynda kıim jáne aıaq kıim turaqty túrde basty orynda keledi – 22,9%, sonyń ishinde qalalyqtarda – 22,8%, aýyl turǵyndarynda – 23%.

Al qyzmetter tólemaqysyna arnalǵan shyǵystarda aılyq tabystyń 33% turǵyn úı-kommýnaldyq qyzmetterge, 32,7% – kólik jáne baılanysqa, 8,2% – densaýlyq saqtaýǵa tıesili.

Mádenı is-sharalar men demalysty uıymdastyrýǵa jumsalǵan shyǵyndar aqyly qyzmetterdiń bolmashy bóligin - 3,6% alady.

Desek te qala turǵyndarynyń aqyly qyzmetterge jumsaıtyn qarajaty aýyldyqtarǵa qaraǵanda 1,9 ese kóp.