Byltyr orman órtinen kelgen zalal 119,04 mln. teńgeni qurady - A.Myrzahmetov

ASTANA. QazAqparat - Byltyr orman órtterinen kelgen zalal 119,04 mln. teńgeni qurady. Búgin QR Premer-Mınıstriniń orynbasary-Aýyl sharýashylyǵy mınıstri Asqar Myrzahmetov Almaty oblysyndaǵy eseptik kezdesýinde osylaı málim etti. Mınıstrdiń aıtýynsha, 2015 jyly memlekettik orman qory men erekshe qorǵalatyn tabıǵı aýmaqtarda 476 orman órti tirkelip, 9 614,2 gektardy jalyn sharpyǵan.

«Orman órtterinen kelgen zalal 119,04 mln. teńgeni qurady, bul kórsetkish 2014 jylmen salystyrǵanda 1,2 esege az. Degenmen, ormandaǵy órt sharpyǵan aýmaq 3,2 esege artyp, bir órttiń sharpyǵan ortasha kólemi 20,2 gektarǵa jetti», - dedi A. Myrzahmetov.
Vedomstvo basshysynyń aıtýynsha, 2015 jyly ormandardy qalpyna keltirý men aǵash otyrǵyzý jumystary 60,2 myń gektarǵa júrgizilgen.

«Orman sektoryn damytýdyń asa mańyzdy basymdyǵynyń biri - aǵash egý sharýashylyǵy jáne ormandardy qalpyna keltirý. El damýynyń 2030 jylǵa deıingi strategııasynda jáne jyl saıynǵy joldaýlardyń barlyǵynda Elbasy atalǵan baǵyttyń mańyzdylyǵyn atap keledi. ıAǵnı, bul memleket aýmaǵynyń ekologııalyq turǵydan ońala túsýine qozǵaý jasaýda», - dedi A. Myrzahmetov.

Sondaı-aq, mınıstr 300 myńǵa jýyq otandasymyz turmysynyń osy orman-toǵaımen baılanystylyǵyna toqtala kele, memleket tarapynan atqarylǵan jumystyń bir parasyn atap ótti.

«Jyldan-jylǵa ormandardy qalpyna keltirý men aǵash egý sharýashylyǵynyń kólemi men sapasyn arttyrý kún tártibinde. Búginde qoldan otyrǵyzylǵan 1 mln. ga orman alqaby bar. Óz kezeginde, bul el aýmaǵyndaǵy ormandy jerlerdiń 10 %-yn qurap otyr», - dedi Asqar Isabekuly.