Byltyr onlaın-platformalarda sýıtsıdti nasıhattaǵan 88 derek anyqtaldy

ASTANA. QazAqparat – Jyl saıyn onlaın-platformalar arqyly azamattardyń derbes derekterin zańsyz taratý faktileri jıilep barady. Bul týraly «Ashyq» NQA portalynda jarııalanǵan «Internet-jarnama jáne onlaın-platformalar týraly» Zań jobasyna qosymsha konsýltatıvtik qujatynda jazylǵan, dep habarlaıdy QazAqparat tilshisi.

Aqparat jáne qoǵamdyq damý mınıstrliginiń «Taldaý jáne aqparat ortalyǵy» júrgizgen monıtorıng nátıjesinde byltyr onlaın-platformalardan myna quqyq buzýshylyqtar anyqtaldy:

- azamattardyń derbes derekterin zańsyz taratý – 100 fakti;

- sýıtsıdti nasıhattaıtyn aqparatty taratý – 88 fakti;

- basqa adamnyń ar-namysy men qadir-qasıetin qorlaıtyn aqparatty taratý – 147 fakti;

– kámeletke tolmaǵannyń jeke basyn anyqtaýǵa múmkindik beretin derbes nemese bıometrııalyq derekterdi, ózge de aqparatty taratý – 21 fakti.

«2021 jáne 2022 jyldardaǵy derekterdi salystyra otyryp, taratý bóliginde anyqtalǵan quqyq buzýshylyqtar sanynyń artqanyn baıqaýǵa bolady. Máselen, 2021 jyly sýıtsıdti nasıhattaıtyn aqparattar týraly 28 fakti anyqtalsa, byltyr munyń sany 88-ge jetti. Al, 2021 jyly basqa adamnyń ar-namysy men qadir-qasıetin qorlaıtyn aqparat taratqan 27 jaǵdaı belgili boldy. Ótken jyly mundaı quqyq buzýshylqtar sany – 147. Kámeletke tolmaǵannyń jeke basyn anyqtaýǵa múmkindik beretin derbes jáne bıometrııalyq derekter, ózge de aqparattardy zańsyz paıdalaný boıynsha 2021 jyly 5 fakti anyqtaldy. Al byltyr 21 jaǵdaı», - delingen qujatta.

Mınıstrlik dereginshe, bul máselelerdiń sebebi - zańnamalyq bazasy bar onlaın-platformalar men onlaın-jarnamalardyń damý dınamıkasy arasyndaǵy alshaqtyq, onlaın-qylmystyń taralýyna qarsy kúreste qazaqstandyqtardyń tıimdi áreket etpeýi.

Qujat 26 sáýirge deıin kópshilik talqylaýda bolady.