Byltyr memleket ekonomıkaǵa 19,5 trln teńge nesıe bergen

NUR-SULTAN. QazAqparat – Byltyr ekonomıkaǵa berilgen nesıe kólemi 24,8% artqan, dep habarlaıdy QazAqparat tilshisi. QR Ulttyq bankiniń resmı saıtynda jarııalanǵan suhbatta Ǵalymjan Pirmatov osyndaı statıstıka keltirdi.

«Negizi ekonomıkaǵa nesıe berý máseleleri Qarjy naryǵyn retteý jáne damytý agenttigi quzyretinde. Ulttyq Bank óz tarapynan 2021 jyldyń shilde aıynan aqsha-kredıt saıasatyn qatańdatý tsıklin bastady. Berilip jatqan jańa nesıelerdi qarastyratyn bolsaq, onyń kólemi, ásirese bızneske berilip jatqan nesıeler, aıtarlyqtaı qomaqty. Mysalǵa, ótken jyldyń ózinde bızneske berilgen jańa kredıtter 20,3%-ǵa ósip, 11,1 trln teńgege deıin jetti. Ekonomıkaǵa berilgen nesıelerdiń jalpy kólemi 24,8%-ǵa, 19,5 trln teńgege deıin artty», - dedi Ulttyq bank tóraǵasy.

Onyń aıtýynsha, bazalyq mólsherlemeniń joǵary deńgeıde qalýy ekonomıkaǵa nesıe berý kórsetkishine keri áser etpegen.

«Nesıe berý azaıǵan joq. Al, bizdiń ortaq maqsatymyz – beriletin nesıeniń sanyn emes, sapasyn arttyrý. Esińizde bolar, osydan jıyrma shaqty jyl buryn el ekonomıkasy qarqyndy ósip, halyqqa nesıe berý údeı túsken. Biraq, odan sapaly nátıje shyǵa qoıǵan joq.

Ulttyq Bank bazalyq mólsherleme boıynsha sheshim qabyldaı otyryp, ınflıatsııamen kúres pen ekonomıkanyń ósýi arasyndaǵy teńgerimdi eskerip, ınflıatsııany tómendetý boıynsha neǵurlym ıkemdi stsenarıdi tańdady», - dedi Ǵalymjan Pirmatov.

Eske salsaq, QUB tóraǵasy jyl aıaǵyna deıin ınflıatsııa 13-15% deńgeıinde qalyptasatyny týraly boljamy jasaǵan edi.

Sondaı-aq, ol teńge/rýbl baǵamynyń qalaı retteletinin túsindirdi.

Reseı men Qazaqstannyń bazalyq mólsherlemesin salystyryp qaraý durys emestigin de aıtty.