Byltyr memleket áleýmettik tólemderge 3,7 trln teńge jumsaǵan

NUR-SULTAN. QazAqparat – Byltyr memleket áleýmettik tólemderge 3,7 trln teńge jumsaǵan. QR Eńbek jáne halyqty áleýmettik qorǵaý mınıstrliginiń keńeıtilgen alqa májilisinde osyndaı málimet aıtyldy, dep habarlaıdy QazAqparat tilshisi.

«Esepti jyly memlekettiń barlyq áleýmettik mindettemelerin oryndaý qamtamasyz etildi. Áleýmettik tólemderge 3,7 trln teńge baǵyttaldy. Bul respýblıkalyq bıýdjet shyǵystarynyń 24%-yn qurady.

Jyl saıynǵy ındeksteý aıasynda 4 mln qazaqstandyq úshin zeınetaqy men járdemaqynyń ósýi qamtamasyz etildi. Azamattyq qyzmetshilerdiń jalaqysyn kezeń-kezeńimen arttyrý jalǵastyryldy. Orta eseppen onyń ósýi bilim berý júıesinde 19%, densaýlyq saqtaý salasynda – 20-30%, áleýmettik salada – 45% - boldy.

Jumys isteıtin qazaqstandyqtar saqtandyrý táýekelderi bastalǵan kezde Memlekettik áleýmettik saqtandyrý qorynan tólemder aldy. 2021 jyly tólemder kólemi shamamen 1,1 mln adam úshin 340 mlrd teńgeni qurady», – dedi mınıstr.

Sondaı-aq ol 2022 jyldyń basynan beri mádenıet, muraǵat isi uıymdarynyń 591 myń azamattyq qyzmetshiniń jalaqysy óskenin atap ótti.