Byltyr memleket áleýmettik mindettemelerin tolyq oryndady - Qarjy mınıstri

NUR-SULTAN. QazAqparat – Byltyr memleket óziniń áleýmettik mindettemelerin tolyq kólemde oryndady. Bul týraly Senattyń jalpy otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstriniń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

Byltyr transfertterdi esepke almaǵanda, kirister boıynsha jospar 156 mlrd teńgege asyra oryndalǵanyna toqtalǵan E. Jamýbaev: «Bıýdjetke 7,4 trln teńge tústi. Salyq túsimderi 7,1 trln teńgeni nemese josparǵa 102,1 paıyzdy qurady. Salyq boıynsha asyra oryndaýdyń negizgi somasy korporatıvtik tabys salyǵyna, shıki munaıǵa, eksport, keden bajyna jáne ımportqa qosylǵan qun salyǵyna tıesili boldy. Salyq túsimderin ulǵaıtýdyń negizgi faktorlary ekonomıkanyń birtindep jandanýy jáne salyq ári keden salasyn ákimshilendirýdi jetildirý boldy. Sońǵy 3 jylda salyq pen keden salasyn ákimshilendirý men tsıfrlandyrýdan bıýdjetke 2 trln teńgeden astam qosymsha túsimder qamtamasyz etilgenin atap ótý kerek», - dedi.

Onyń aıtýynsha, 2021 jyldyń qorytyndysy boıynsha Qytaı Halyq Respýblıkasynyń eksporty – Qazaqstan Respýblıkasynyń ımporty baǵyty boıynsha statıstıkalyq derekterdegi alshaqtyq 40,5 paıyzǵa deıin tómendedi.

Sonymen qatar Premer-Mınıstrdiń orynbasary bıýdjet shyǵystaryna da toqtaldy.

«2021 jyly bıýdjet shyǵystary 56 strategııalyq baǵytty qamtydy jáne damý josparlarynyń 263 ındıkatoryna qol jetkizildi. Ulttyq jobalar men memlekettik baǵdarlamalardy iske asyrý eldiń áleýmettik-ekonomıkalyq damýyna oń áser etti. Máselen, ótken jyly 17 mln sharshy metrden astam turǵyn úı paıdalanýǵa berildi. Qalalar men aýyldarda 5,3 myń shaqyrymǵa jýyq sýmen jabdyqtaý jelileri salyndy. Jergilikti mańyzy bar 1 287 shaqyrym avtojol jańǵyrtyldy. Kóliktiń barlyq túrlerimen júk tasymaldaý kólemi 3,7 mlrd tonnany qurady. Agroónerkásiptik keshende 24 myńnan astam ınvestıtsııalyq joba sýbsıdııalaýmen qamtyldy», - dedi ol.

«Bilim berý, densaýlyq saqtaý jáne mádenıet salasynda pedagogtardyń, dárigerlerdiń, mádenıet jáne halyqty áleýmettik qorǵaý qyzmetkerleriniń eńbekaqysy kóterildi. Tek osy maqsattardyń ózine shamamen 950 mlrd teńge jumsaldy. Epıdemııaǵa qarsy sharalardy júrgizýge 422 mlrd teńgeden astam qarajat bólindi. Jalpy, pandemııaǵa qaramastan, memleket óziniń áleýmettik mindettemelerin tolyq kólemde oryndady», - dedi E. Jamaýbaev.