Byltyr mektep-balabaqshalardyń 77 paıyzy alǵashqy memlekettik attestatsııadan súringen

ASTANA. QazAqparat – QR Oqý-aǵartý mınıstri Ǵanı Beısembaev bilim berý uıymdaryn memlekettik attestatsııadan ótkizý jáne lıtsenzııalaý jumysy týraly aıtyp berdi, dep habarlaıdy QazAqparat tilshisi.

«Bilim berýdi damytýdyń mańyzdy quraly – sapaǵa mán berý. Osy oraıda bilim mekemeleri memlekettik attestattaýdan ótedi. Sońǵy 5 jylda memlekettik attestattaý ótkizilmedi jáne bilim berý qyzmetteriniń sapasyna narazylyqtyń artqanyn baıqadyq. Sondyqtan memlekettik attestattaý qaıta qolǵa alyndy. Ol mektepke deıingi, orta, tehnıkalyq jáne kásiptik bilim berý uıymdaryna barmaı-aq jańa formatta ótkiziledi», - dedi Ǵanı Beısembaev vedomstvonyń keńeıtilgen otyrysynda.

Mınıstrdiń málimetinshe, byltyr 2363 bilim berý uıymy memlekettik attestattaýdan ótti.

«Onyń 77% alǵashqy sátten óte almady. Olardyń qatarynda Atyraý, Aqtóbe, Ulytaý, Aqmola, BQO, Qaraǵandy, Túrkistan jáne Almaty oblystarynyń bilim mekemeleri bar. Odan bólek, mektepter men kolledjderdi lıtsenzııalaý kezinde kóptegen másele týyndaıdy. Mundaǵy problema - qujattardy durys resimdemeý. Osy oraıda qyzmetin lıtsenzııasyz atqarǵany úshin 34 mektepke aıyppul salady. Bilim berý uıymdary lıtsentsııasyz jumys istemeýi kerek», - deıdi ol.

Buǵan deıin Ǵ. Beısembaev balabaqshada 3-4 jasar búldirshinderdi sabaq emes, oıyn arqyly damytý ádisi engizilgenin aıtqan edi.