Byltyr MÁMS esebinen 10 myńǵa jýyq ota jasaldy

NUR-SULTAN. QazAqparat – 2020 jyly Mindetti áleýmettik medıtsınalyq saqtandyrý esebinen 10 myńǵa jýyq qymbat joǵary tehnologııalyq ota jasaldy. Bul týraly Ortalyq kommýnıkatsııalar qyzmetinde ótken brıfıngide Áleýmettik medıtsınalyq saqtandyrý qorynyń Basqarma tóraǵasy Bolat Tókejanov aıtty, dep habarlaıdy QazAqparat tilshisi.

«2020 jyldyń qorytyndysy boıynsha medıtsınalyq saqtandyrý paketi esebinen 10 myńǵa jýyq joǵary tehnologııalyq medıtsınalyq qyzmet (JMQ) ótkizildi. Emniń ortasha quny – 3,2 mln teńge. Hırýrgııalyq aralasýdyń kóp bóligi angıohırýrgııalyq, oftalmologııalyq, kardıohırýrgııalyq, neırohırýrgııalyq, travmatologııalyq jáne ortopedııalyq beıinderge jatady», - deıdi Áleýmettik medıtsınalyq saqtandyrý qorynyń Basqarma tóraǵasy Bolat Tókejanov.

Onyń aıtýynsha, júrek qaǵysynyń buzylýyna qatysty endovaskýlıarlyq qymbat otalar kóbeıgen.

«Mysaly, avtomatty kardıoverter/defıbrıllıatordy ımplantatsııalaý sany 1,5 ese ósti. Mundaı otanyń ortasha quny 6 mln teńgeden asady, ótken jyly osyndaı 1213 ota júrgizildi. Medıtsınalyq saqtandyrý qarajaty esebinen múmkindigi shekteýli balalarǵa kóbirek operatsııa jasaldy. Sonymen, shala týǵan nárestelerdiń retınopatııasyn emdeý operatsııalary bir jarym ese ósti. Elektrmagnıtti estý apparatyn ımplantatsııalaý sany 1,5 ese ósti. Osyndaı bir qyzmettiń ortasha quny orta eseppen 5,5 mln teńge. Kez kelgen ýaqytta ózimizge nemese jaqynymyzǵa birdeı kómek qajet bolmaıtynyna eshkim kepildik bere almaıdy. Osyndaı sátterde medıtsınalyq saqtandyrýdyń róli erekshe túsinikti bolady jáne ol jınaqtaýshy emes, áleýmettik, barlyǵyna qoljetimdilik qaǵıdaty boıynsha jumys isteýi tıis», - deıdi ol.