Byltyr Qazaqstan Qarýly kúshteri 150-den astam jańa áskerı tehnıka satyp alǵan

ASTANA. QazAqparat – Qorǵanys mınıstriniń orynbasary Rýslan Shpekbaev Májilis depýtattarynyń saýalyna bergen jaýabynda 2022 jyly Qarýly kúshter qansha tehnıka satyp alynǵany týraly málimet berdi, dep habarlaıdy QazAqparat tilshisi.

«Qarýly kúshterdiń jaýyngerlik ázirligi jyldan jylǵa artyp keledi. Ol úshin bıýdjette 20 mlrd teńgeden astam qarajat kózdelgen. Jaýyngerlik ázirlik qarqynyn arttyrý úshin jartyjyldyq oqý tsıkli engizildi, ol áskerı bólimderdiń jáne áskerı qyzmetshilerdiń daıarlyǵy sapasyn arttyra tústi. Áskerde qazirgi zamanǵy oqytý ádistemesi engizilip, resýrsty únemdeý úshin polıgon jabdyǵy men oqý trenajerleriniń sany ulǵaıtylyp jatyr», - dep jazady mınıstrdiń mindetin ýaqytsha atqarýshy.

Aıtýynsha, byltyr satyp alynǵan tehnıkanyń ishinde áskerı ushauqtar men zenıttik-zymyran kesheni de bar.

«2022 jyly Qarýly kúsh quramalary men áskerı bólimderine 150-den astam jańa áskerı tehnıka satyp alyndy, onyń ishinde kópfýnktsıonaldy Sý-30 SM ushaqtary, TOR-M2E zenıttik-zymyran kesheni, «Arlan» brondy dóńgelekti mashınalary, GM-403 radıolokatsııa stantsııasy, robototehnıka kesheni jáne basqa bar. Budan basqa, 10 myńnan astam arnaıy qural men qazirgi zamanǵy baılanys quraldary qarý-jaraqqa alyndy. Sonymen qatar, 90-nan astam áskerı tehnıka kúrdeli jóndeýden jáne jańǵyrtýdan ótkizildi», - delingen jaýapta.