Byltyr elimizde 85 eńbek daýy tirkelgen
«Jańa qoǵamdyq kelisim: Ádiletti eńbek qatynastary» atty áleýmettik áriptester forýmynyń aldynda Kásipodaqtar federatsııasynyń tóraǵasy BAQ ókilderine munaı-gaz salasyndaǵy eńbek daýy týraly málimet berdi.
«Byltyr elimizde 85 eńbek daýy boldy. Onyń kóbi munaı salasynda, onyń ishinde Mańǵystaý oblysynda boldy. Ol jerdegi kóterilgen máseleler: eńbekaqy máselesi, qolaısyz eńbek jaǵdaıynyń týyndaýy jáne jumys berýshilerdiń eńbekkkerler quqyǵyn buzýy. Sol 85 daýdyń tóńireginde qarasaq, olarǵa myńdaǵan adam qatysty dep aıtýǵa bolady», - dedi ol.
Satybaldy Dáýletalın federatsııa eńbek daýlaryn sheshýge qatysy bar zańnamany jetildirýge belsendi atsalysyp jatqandaryn aıtady.
«Jańaǵy 85 daýdyń ishinde tek 41-inde ǵana kásipodaǵy bar kásiporyndar boldy. Biz soǵan qaramastan búkil 85 daýdyń sheshilýine kelissóz júrgizýge tikeleı aralastyq. Sol aralasýdyń arqasynda, basqa da áleýmettik áriptesterdiń atsalysýynyń arqasynda daýlardyń 80 paıyzy eńbekkerdiń múddesine, oń sheshildi dep aıta alamyn. Biraq bul jerde de kóptegen másele bar. Shynyn aıtý kerek, bolǵan 85 daýdyń, ereýildiń kóbi sot júıesi boıynsha zańsyz dep tanyldy. Sebebi qazirgi tańda eńbek daýyn, ásirese ujymdyq eńbek daýyn sheshý bizdiń Eńbek kodeksinde óte qıyndatylǵan. Sondyqtan qazir biz zań jobasyna óz usynystarymyzdy berdik. Sony jeńildetý máselesin, talap qoıýǵa kásipodaqtyń tikeleı aralasýyna jol ashatyn normalar usyndyq. Qazir ol zań Májilisten ótti, Senattyń qaraýnyda jatyr. Eger sol Senat sheshim qabyldasa, meniń oıymsha, ereýilder bizdiń ekinshi qarýymyz bolar edi. Biraq kásipodaqtar osy bolǵan daýlardyń bárin alǵanda eshqashan áleýmettik shıelenistiń basynda turǵan joq. Biz meılinshe qandaı daý bolsa da, zań aıasynda sheshilýine atsalystyq», - dedi Kásipodaqtar federatsııasynyń tóraǵasy.