Byltyr eldegi kásiporyndarda bolǵan apttardan 15 adam kóz jumdy

ASTANA. QazAqparat – Ótken jyldyń qorytyndysy boıynsha kásiporyndarda 28 avarııa tirkelip, 32 adam zardap shekti. Muny Ortalyq kommýnıkatsııalar qyzmetinde ótken brıfıngide QR Tótenshe jaǵdaılar mınıstrliginiń Ónerkásiptik qaýipsizdik komıtetiniń tóraǵasy Nyǵmedjan Maqajanov aıtty, dep habarlaıdy QazAqparat tilshisi.

«Qazirgi ýaqytta ónerkásiptik qaýipsizdik salasynda 10 myńǵa jýyq ónerkásiptik kásiporyn qadaǵalanýda. Olardyń quramynda 200 myńnan astam qaýipti óndiris nysandary bar. Qaýipti óndiristik nysandardy paıdalaný protsesinde qoldanylatyn tehnologııalyq jabdyqtyń moraldyq jáne fızıkalyq tozýyna, onyń ýaqyty aýystyrylmaýyna jáne jóndelmeýine baılanysty tótenshe jaǵdaılar bolý qaýipi týyndaıdy. 2022 jyldyń qorytyndysy boıynsha 28 avarııa tirkelip, saldarynan 32 adam zardap shekti. 15 adam qaıtys boldy. Ózderińiz biletindeı, osyndaı avarııalardyń biri ótken jyly qarasha aıynda «ArselorMıttal Temirtaý» kompanııasynyń Lenın atyndaǵy shahtasynda bolyp, saldarynan 9 adam zardap shegip, onyń beseýi qaıtys boldy», - dedi komıtet tóraǵasy.

Eske salaıyq, byltyr 3 qarashada Shahtınsk qalasyndaǵy Lenın atyndaǵy shahtada apat boldy.

Artynsha bir oqıǵa boıynsha qylmystyq is qozǵalǵan edi. Sonymen birge «ArselorMıttal Temirtaý» kompanııasynyń jumysy toqtaýy múmkin ekeni aıtyldy.