Byltyr Ekologııa mınıstrligi 4,4 mlrd teńgeniń aıyppulyn óndirgen

ASTANA. QazAqparat – Byltyr Ekologııa jáne tabıǵı resýrstar mınıstrliginiń aýmaqtyq departamentteri ekologııalyq zańnamany buzǵan mekemelerden 4,4 mlrd teńge aıyppul óndirgen. Bul jaıynda Ekologııalyq retteý jáne baqylaý komıteti tóraǵasynyń mindetin atqarýshy Aıdar Abdýalıev Ortalyq kommýnıkatsııalar qyzmetinde ótken brıfıngide málim etti, dep habarlaıdy QazAqparat tilshisi.

«Komıtettiń aýmaqtyq departamentteri ótken jyly sharýashylyq júrgizýshi sýbektilerge ekologııalyq zańnamany saqtaý boıynsha 1 627 tekserý júrgizdi. 5,8 mlrd teńge kóleminde ákimshilik aıyppul salyndy. Memleket kirisine 4,4 mlrd teńge aıyppul óndirildi», - dedi mınıstrlik ókili.

Onyń aıtýynsha, 2022 jyly respýblıka kóleminde qorshaǵan ortaǵa tastalǵan zııandy shyǵaryndylardyń jalpy kólemi 4,2 mln tonna bolǵan. Bul 2021 jyldaǵydan 200 myń tonnaǵa az.