«Byltyr berilgen ǵımarat qulaǵaly tur» - respýblıkalyq basylymdarǵa sholý
***
Beısenbi kúni Aqordada Memleket basshysy Nursultan Nazarbaev V Astana ekonomıkalyq forýmynyń jumysyna qatysýshy Nobel syılyǵynyń laýreattarymen jumys babyndaǵy erteńgilik asta kezdesti. Osy jaıt arqaý bolǵan maqala «Egemen Qazaqstan» gazetinde «Forýmnyń jumys organy quryldy» degen taqyryppen berildi. Basylymnyń atap ótýinshe, N.Nazarbaev Nobel syılyǵy laýreattaryna Astana ekonomıkalyq forýmyn ótkizý ıdeıasyna qoldaý bildirgenderi úshin alǵysyn aıtty. Beıresmı pishindegi áńgimelesý barysynda Nobel syılyǵynyń laýreattary Prezıdentpen birge jahandyq ekonomıkany damytýdyń keń aýqymdy máselesi men álemdegi geosaıası jaǵdaıdy, sondaı-aq birqatar ózge de ózekti taqyrypty talqylady. Budan basqa, Forýmnyń mıssııasyn júıeli negizde oryndaı alatyn turaqty túrde jumys jasaıtyn organ qurý qajettigi týraly másele kóterildi.
***
«Alash aınasy» gazetinde «Neokon» sarapshylyq keńes berý seriktestiginiń prezıdenti, RBK telearnasynyń «Hazınmen suhbat» baǵdarlamasynyń júrgizýshisi Mıhaıl Hazınmen aradaǵy suhbat «Kedendik odaq TMD aıasynan da shyǵyp ketýi ábden múmkin» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Eń bastysy, AQSh-tyń qazirgi álemdik ekonomıkadaǵy ústemdigi álsirep, dollardyń róli tómendeıdi. Aqsha aıyrbasy salasynda Amerıka valıýtasyna kóp basymdyq berilmeıdi. Ol - fakt. Buǵan qarsy olar eshteńe isteı almaıdy. Sebebi suranys tómendep jatyr. Osynyń nátıjesinde aqsha aıyrbasy operatsııalary da azaıady», - deıdi.
Qas pen kózdiń arasynda úıindige aınalǵan Qaraǵandydaǵy kópqabatty úıdiń «taǵdyryna» tańdaıyn taqyldatyp, jaǵasyn ustamaǵan jan qalmady. Alaıda mundaı sumdyq oqıǵanyń «syńary» joq degenge qazir eshkimde ımandaı ılana qoımas. Óıtkeni sapasy tym tómen, paıdalanylmaı jatyp jaramsyz bolyp qalǵan nysandardyń sany artpasa, kemıtin túri joq. Máselen, «Alash aınasy» gazetiniń jazýynsha, ońtústiktiń ońtústigi esepteletin Maqtaaral aýdanynda osyndaı bir sapasyz nysanǵa qatysty daýdyń túndigi túrilipti. Maqala «Byltyr berilgen ǵımarat qulaǵaly tur» degen taqyryppen basylǵan.
***
«Qazaqstan Ortalyq Azııadaǵy IPO ortalyǵy bola alady», - dep jazady «Lıter» gazeti «Narodnoe ýpravlenıe» degen taqyryptaǵy maqalasynda. Basylymnyń atap ótýinshe, 5-shi Astana ekonomıkalyq forýmy aıasynda ótken pikirsaıys barysynda «PricewaterhouseCoopers» konsýltatsııalyq keńesiniń tóraǵasy Djon Statterd egerde bul ıdeıa sátti júzege asar bolsa onda Qazaqstan Ońtústik-Shyǵys Azııadaǵy Qytaı, Sıngapýr syndy Ortalyq Azııadaǵy IPO ortalyǵy bola alady degen pikirin bildirgen. Forým aýqymynda ótken «Aktsııa naryǵy: IPO álemi» sessııasynda «Halyqtyq ІRO» jobasyn júzege asyrý barysynda týyndaıtyn qaýipter, sonymen qatar onyń oń jaqtary keńinen talqylandy.
***
«Qazaqstandyq ınternet paıdalanýshylar reseılik oppozıtsıoner Alekseı Navalnyıǵa Abaıdyń óleńderi jazylǵan fýtbolkany syıǵa tartpaq», - dep jazady «Ekspress K» gazeti «Prıjat Abaıa k grýdı» degen taqyryptaǵy maqalasynda. Basylymnyń jazýynsha, "Tsentr Tıajestı" forýmynda jarııalanǵan úzdik eskız konkýrsy 31 mamyrda aıaqtalady. Osy ıdeıaǵa bastamashy bolǵandardyń biri Іńkár Mirjaqypovanyń aıtýynsha, atalǵan syılyq Navalnyıǵa Abaıdyń «túsiniksiz qazaq» emes qazaqtyń uly aǵartýshysy ekendigin bildirý úshin jasalyp otyr. Qazirgi ýaqytta baıqaýǵa alty úlgi kelip túsken.
***
«Keshe Qazaqstan Prezıdenti Nursultan Nazarbaev Túrkitildes memleketter yntymaqtastyǵy keńesiniń Bas hatshysy Halıl Akynjyny qabyldady», - dep jazady «Kazahstanskaıa pravda» gazeti. Basylymnyń atap ótýinshe, H.Akynjy Memleket basshysyna Keńes tarapynan atqarylǵan jumys týraly baıandady, sondaı-aq ótken jyly Almatyda ótken Túrkitildes memleketter yntymaqtastyǵy keńesi sammıtiniń qorytyndylary týraly aıtyp berdi. Kezdesý barysynda sondaı-aq bıyl Bishkekte ótetin aldaǵy sammıt máselesi talqylandy. Alda ótkeli otyrǵan is-sharanyń kún tártibiniń negizgi taqyryby «Bilim, ǵylym jáne mádenıet» bolmaq.