Byltyr BAQ-ta KVI taqyrybynda 270 myńnan astam materıal shyqty - Kemelbek Oıshybaev
«2020 jyldyń qorytyndysy boıynsha elimizde koronavırýstyq ınfektsııamen kúresý jumystary aqparattyq kún tártibiniń basty taqyryby boldy. Jalpy, barlyq memlekettik organdar qyzmetin tolyq aqparattandyrý maqsatynda mınıstrlik 2020 jylǵa arnalǵan «Jasampazdyqqa toly jyldar» respýblıkalyq medıajosparyn ázirlep, jyl basynda Úkimettiń otyrysynda bekitken. Onyń negizgi baǵyttary – Táýelsizdigimizdiń 30 jyldyǵy, «Rýhanı jańǵyrý» baǵdarlamasyn iske asyrý jáne volonterler júıesiniń damýy bolǵan. Biraq, koronavırýsqa baılanysty naýryz-mamyr aılarynda Qazaqstanda tótenshe jaǵdaı jarııalanǵanda COVID-19-ǵa qatysty jasalyp jatqan isterdi halyqqa tez jetkizý maqsatynda Úkimettiń sheshimimen respýblıkalyq kommýnıkatsııalyq ortalyq quryldy. Onyń jumysyna bizdiń mınıstrlikpen qatar Densaýlyq saqtaý mınıstrliginiń ókilderi de belsendi qatysyp keledi», - dedi Kemelbek Oıshybaev.
Sonymen qatar ol naýryz aıynda coronavirus2020.kz iske qosylǵanyn eske saldy. Ol statıstıkalyq málimetter, ınfografıkalyq, saraptamalyq materıaldarmen tolyqtyrylyp otyr. Saıtqa kúnine 100 myńnan astam adam kirip kóredi. Telegram messendjerinde coronavirus2020 atty resmı kanal iske qosyldy, oǵan qazirgi ýaqytta 300 myńnan astam oqyrman tirkelgen.
«Shilde aıynda stopfake.kz saıtyn iske qostyq. Ol BAQ-ta, áleýmettik jelilerde, messendjerlerde taralyp jatqan aqparattardy anyqtap, feık ekenin málimdep, halyqqa túsindirý jumystaryn júrgizedi. Qazirge deıin 450-ge jýyq materıaldyń jalǵan ekeni dáleldenip, qoǵamǵa jetkizildi», - dedi vıtse-mınıstr.
Munymen qosa ol tótenshe jaǵdaı kezinde Ortalyq kommýnıkatsııalar qyzmeti eldegi basty aqparat alańyna aınalǵanyn, onlaın rejımde 200-ge jýyq brıfıng ótkizilgen málim etti.
«Barlyq telearnalarda kóptegen baǵdarlamalar koronavırýs taqyrybyna baǵyttaldy. KVI-diń aldyn alý taqyryby boıynsha 250-den astam beınerolık daıyndaldy, respýblıkalyq BAQ-ta 5 myńnan astam ınfografıka men telegrafıka jarııalandy. Osylaısha, mınıstrlik memleket tarapynan qabyldanǵan daǵdarysqa qarsy sharalar týraly aqparattandyrý boıynsha aýqymdy jumys júrgizdi», - dep toqtaldy Kemelbek Oıshybaev.
Onyń aıtýynsha, 2020 jyly KVI taqyryby boıynsha buqaralyq aqparat quraldarynda 274 myń materıal jaryq kórgen.