Byltyr Atyraý oblysynda 8,5 trln teńgeniń ónerkásip ónimi óndirildi
Oblystyq ekonomıka jáne bıýdjettik josparlaý basqarmasynyń basshysy Aıgúl Ájiǵalıeva málimetine súıensek, ótken jyly óńirdiń birneshe salasynda ósim baıqalǵan.
«Ótken jyly ónerkásip óniminiń kólemi 8,5 trln teńgeni qurady. Al, taý-ken ónerkásibinde 7,7 trln teńgeniń ónimi óndirildi. Óńdeý ónerkásibindegi ónim kólemi 693 mlrd teńgege jetti. Aýyl, orman jáne balyq sharýashylyǵy salasynyń ókilderi 114 mlrd teńgeniń ónimin óndirýge qol jetkizdi», -deıdi Aıgúl Ájiǵalıeva.
Onyń aıtýynsha, qurylys jumystarynyń kólemi artqan. Bul ásirese, Atyraý qalasy men Jylyoı aýdanynda baıqalyp otyr. Shaǵyn jáne orta kásipkerlik sýbektileriniń sany 3,6 paıyzǵa artyp, 52 myńǵa jetken.
«Investıtsııalar tartý baǵytyndaǵy jumystardy odan ári jandandyryp, naqty is-sharalar qolǵa alý qajet. Bıýdjettik qarjynyń ıgerilýine 2 aı buryn monıtorıng júrgizý kerek. Josparlanǵan shyǵystardy ýaqytynda ıgerý úshin taýarlar men qurylystardyń, qyzmetterdiń sapaly bolýyn qadaǵalap, zań sheńberinde tıisti sharalar qabyldaǵan jón», -dedi oblys ákimi Mahambet Dosmuhambetov.
Oblys ákiminiń aıtýyna qaraǵanda, ótken jyly josparlanǵan nátıjege qol jetkizbegen jaýapty sheneýnikter bar. Sondaı-aq, Atyraý qalalyq ákimidigine qarasty keıbir aýyldyq okrýgterdiń ákimderi bıýdjetti tıimsiz josparlaǵan. Endi jaýapsyz sheneýnikterge qatysty tártiptik shara qoldanylýy múmkin.
Eske sala ketelik, buǵan deıin Atyraý oblysynda aýyl sharýashylyǵyn damytýǵa 2,5 mlrd teńge bólingenin habarlaǵan bolatynbyz.