Byltyr atmosferaǵa 2,4 mln tonna lastaýshy zat shyǵarylǵan

NUR-SULTAN. QazAqparat – Qazaqstannyń atmosferasyna shyǵarylǵan zııandy zattardyń jartysynan astamy Pavlodar men Qaraǵandy oblystarynyń kásiporyndaryna tıesili. Bul týraly QazAqparat Energyprom.kz saıtyna silteme jasap habarlaıdy.

«2021 jyly búkil statsıonarlyq kózderden shyǵarylǵan lastaýshy zattardyń jalpy kólemi 34,3 mln tonna boldy. Atalǵan kólemniń 31,9 mln tonnasy nemese 93%-y súzilip, zalasyzdandyryldy. ıAǵnı, 2021 jyly Qazaqstan atmosferasyn 2,4 mln tonna shyǵaryndy lastady degen sóz. Bul 2020 jylmen salystyrǵanda 1,4% az»,- dep jazady resýrs.

Energyprom.kz-tiń taldaýyna súıensek, aýaǵa tastalǵan laýtaýshyzattardyń jartysynan astamy Pavlodar jáne Qaraǵandy oblystaryndaǵy kásiporyndarǵa tıesili.

«Pavlodar oblysynda 736,2 myń tonna, Qaraǵandy oblysynda 569,7 myń tonna lastaýshy zat atmosferaǵa shyǵarylǵan. Sondaı-aq Atyraý (160,3 myń tonna), Qostanaı (137,9 myń tonna), Aqtóbe (137,4 myń tonna) jáne Shyǵys Qazaqstan (128,1 myń tonna) oblastarynda shyǵaryndylardyń kólemi aýqymdy», - dep jazylǵan materıalda.

Sala boıynsha aıtsaq, aýaǵa shyǵarylǵan 2,4 mln zattyń 2,1 mln tonnasy ónerkásipke tıesili. Sonyń ishinde jylý men energııa óndirýshi kásiporyndardyń lastaý kórsetkishi orasan – 945,2 myń tonna. Odan keıingi orynda óńdeý ónerkásibi – 728,1 myń tonna. Úshinshi orynda taý-ken ónerkásibi – 356,6 myń tonna.

Aıta keteıik, jyl basynda Ekologııalyq retteý jáne baqylaý komıteti eldegi atmosferanyń lastanýy joǵary qalalardy ataǵan bolatyn.