Byltyr 3 óńirde týý kórsetkishi joǵary boldy – ulttyq statıstıka

ASTANA. QazAqparat – 2022 jylǵy qańtar-jeltoqsanda elimizdiń 3 óńirinde týý kórsketkishi joǵary boldy. Bul týraly Ulttyq statıstıka bıýrosynan málim etti, dep habarlaıdy QazAqparat.

2023 jylǵy 1 qańtardaǵy jaǵdaı boıynsha halyq sany 19 765 004 adamdy qurady, onyń ishinde qala turǵyndary – 12 208 259, aýyl turǵyndary – 7 556 745 adam.

Ótken bir jylda Qazaqstanda 403,5 myń sábı (450,7 myń adam – 2021 j) dúnıege keldi, onyń ishinde 208 myńy – uldar, 195,5 myńy – qyzdar. Týý koeffıtsıenti 1000 adamǵa 20,28 qurady. Atalǵan kezeńde qaıtys bolǵandar sany 134,7 myń adamdy qurady, bul rette 1000 adamǵa shaqqandaǵy ólim-jitim koeffıtsıenti – 6,77. Osylaısha, halyqtyń tabıǵı ósimi 2022 jyldyń 12 aıynda 268,8 myń adamdy qurady (2020 jyly – 263 myń, 2021 jyly – 267 myń).

Týýdyń eń joǵary deńgeıi Mańǵystaý (1000 turǵynǵa 27,75 adam), Túrkistan oblystarynda (1000 turǵynǵa 27,23 adam) jáne Shymkent qalasynda (1000 turǵynǵa 26,34 adam) baıqaldy.

Ólim-jitimniń eń joǵary deńgeıi – Soltústik Qazaqstan (1000 turǵynǵa 11,84), Shyǵys Qazaqstan (1000 turǵynǵa 11,71) jáne Qostanaı oblystarynda (1000 turǵynǵa 10,82) baıqaldy, bul osy óńirler halqynyń jas qurylymyna baılanysty.