Byltyr 17 mıkroqarjy uıymy lıtsenzııasynan aıyryldy

ASTANA. QazAqparat – Qarjy uıymyn májbúrlep taratqan nemese ony bankrot etken basshylardyń arnaıy esebi júrgizilmek. Tıisinshe, ondaı laýazymdy tulǵalar basqa qarjy uıymdaryn basqarýǵa jiberilmeıdi. Bul týraly Qarjy naryǵyn retteý jáne damytý agenttigi ashyq talqyǵa shyǵarǵan Retteý saıasatynyń konsýltatıvtik qujat-jobasynda kórsetilgen, dep habarlaıdy QazAqparat tilshisi.

«Mıkrokredıt berý sektorynda 252 mıkroqarjy uıymy jumys isteıdi. Byltyr osyndaı 17 kompanııa lıtsenzııasynan aıyryldy. Sonymen qatar QR zańnamasynda agenttiktiń qarjy uıymyn májbúrlep taratýǵa nemese ony bankrot dep tanýǵa ákep soqqan basshylardyń esebin júrgizýge múmkindik bermeıdi. Osyǵan baılanysty ózge qarjy uıymdarynda olardyń basshylyq laýazymǵa ornalasýyna jol bermeý maqsatynda osy tulǵalardyń esebin júrgizý jáne baqylaý júrgizý usynylady. Osylaısha, ýákiletti organ jaýapsyz adamdardyń qarjy sektoryndaǵy laýazymdarǵa ornalasýyna jol bermeý jóninde sharalar qabyldaı alady», - delingen Ashyq NQA portalynda jarııalanǵan Retteý saıasatynyń konsýltatıvtik qujatynda.

Sonymen birge byltyr qazaqstandyqtar tarapynan bank jáne mıkroqarjy sektoryndaǵy uıymdardyń jumysyna qatysty 35 myńnan asa ótinish túsken.

Buǵan qosa, atalǵan konsýltatıvtik qujatta elimizde múmkindigi shekteýli azamattardyń qarjylyq qyzmetterge qoljetimdilik deńgeıi tómen ekeni jazylǵan.