Byltyr 133 myńnan astam bala sýret, bı, mýzyka úıirmelerine tegin qatysqan

NUR-SULTAN. QazAqparat – Byltyr 133 myńnan astam bala sýret, bı, mýzyka úıirmelerine tegin qatysqan. QR Mádenıet jáne sport mınıstri Dáýren Abaev vedomstvonyń mádenıet, arhıv isi jáne baspa máselelerine arnalǵan keńeıtilgen alqa májilisinde osyndaı málimet keltirdi, dep habarlaıdy QazAqparat tilshisi.

«2021 jylǵy 1 qańtardan bastap mádenıet salasyndaǵy arnaýly mektepter men kolledj qyzmetkerleriniń jalaqysy 25 paıyzǵa ósti.

Memleket alǵash ret shyǵarmashylyq úıirmelerin jan basyna shaqqandaǵy qarjylandyrý ınstıtýtyn engizdi. Sonyń arqasynda ótken jyly 133 myńnan astam bala sýret, bı, mýzyka jáne basqa da úıirmelerge tegin qatysty», - dedi vedomstvo basshysy.

Onyń aıtýynsha, qoldanystaǵy «Mádenıet týraly» jáne «Kınematografııa týraly» zańdarǵa ózgerister engizý jumystary áli jalǵasyp jatyr.

Atalmysh jıynda Dáýren Abaev elimizde 300-den astam mádenı nysanǵa suranys bar ekenin atap ótti.

«Búginde elimizde 7637 mádenı nysan jumys istep tur. Taǵy da 300-den astam mekemege suranys bar. Ondaı qajettilik negizinen aýyldarda sezilip otyr», -dedi mınıstr.