Bylapyt sóılegen basshy jumystan ketýi múmkin - Almaty oblysy
Endi olar bul usynystaryn Ádilet mınıstrligine joldaıdy, dep habarlaıdy QazAqparat tilshisi.
Almaty oblystyq Ádilet departamentiniń basshysy Meırambek Qanybekovtiń máselesi ádep keńesinde eki saǵatqa jýyq qaraldy. Departamenttegi qyzmetkerler basshysyn aıyptap, onyń bylapyt sóılegenin jáne dórekiligin, qyzmettik babyn paıdalanatynyn alǵa tartty. Biraq Meırambek Qanybekovke qoldaý bildirip, oǵan eshqandaı qarsylyq bildirmegen qyzmetkerler de boldy. Keńes otyrysynda komıssııa músheleri Meırambek Qanybekovtyń daýysy jazylǵan aýdıojazbany da tyńdady.
«Qurmetti komıssııa músheleri Ádilet departamentine ádiletsiz basshy kelipti. Óte ókinishti. Bul kisi óziniń óreskel minezimen, ujymdy ekige jarýymen, dıktatorlyq jumys stılimen, belden basyp sheshim qabyldaýymen tek oblystyq Ádilet departamenti, Ádilet mınıstrligi ǵana emes, búkil Almaty oblysynyń atyna kir keltirip otyr dep esepteımin», dedi Almaty oblystyq ádep jónindegi keńestiń komıssııa múshesi Ámire Árin.
Al Almaty oblystyq ádilet departamentiniń basshysy Meırambek Qanybekov aýdıojazbaǵa jazylǵan daýys óziniki ekenin rastady. Biraq bul sózder qaramaǵyndaǵy qyzmetkerge emes, óziniń ulyna aıtylǵanyn aıtty. Muny estigen komıssııa músheleri balańyzben qalaısha osyndaı deńgeıde sóılesesiz dep synap tastady.
«QR Memlekettik qyzmeti týraly zańynyń 61-shi baby, 1-shi tarmaǵy, 8-shi tarmaqshasyna sáıkes Almaty oblystyq Ádilet departamentiniń basshysy Qanybekovke atqaratyn laýazymynan bosatý týraly jónindegi jaza qoldanylsyn degen usynys daýysqa salý arqyly 100 paıyz sheshimin tapty. Ádilet mınıstrliginiń jaýapty hatshysyna usynysymyzdy jiberemiz», dedi Almaty oblysyndaǵy ádep jónindegi keńestiń tóraǵasy Serikbaı Nurǵısaev.
Endi Almaty oblystyq Ádilet departamentiniń basshysy Meırambek Qanybekovti laýazymynan bosatý jónindegi naqty sheshimdi Ádilet mınıstrligi qabyldaıdy.