«Buırabas» atty qysqametrajdy anımatsııalyq fılm túsirilmek

ASTANA. QazAqparat – Kishkentaı kórermender úshin «Buırabas» qysqametrajdy anımatsııalyq fılmi túsirilmek, dep habarlaıdy QazAqparat.

Fılmniń rejısseri Saqıolla Qasıettiń aıtýynsha, týyndy Qazaqstan Respýblıkasy mádenıet jáne sport mınıstrliginiń tapsyrysy boıynsha, «Ulttyq kınony qoldaý memlekettik ortalyǵy» KEAQ-nyń qoldaýymen jasalyp jatyr. Prodıýsseri — Aralbaı Kýanyshbek.

«Fılm balalar úshin erekshe qyzyq bolady dep oılaımyz. Onda, ózdiginen jumys isteýge nıeti joq, dese de, bastyq, baı bolǵysy keletin Sabanshy ańqaý bolsa da pysyq Qozyny ózine ılandyryp, kásip ashady. Odan túk shyqpaı, saly sýǵa ketkende, Saryshunaq kep, altyn izdeýge shaqyrady. Osylaısha, úsh keıipkerdiń altyn izdeýdegi shytyrman oqıǵasy baıandalady. Týyndy jyl sońyna deıin daıyn bolady», - deıdi Saqıolla Qasıet.

Aıta keteıik, Saqıolla Qasıettiń bul alǵashqy týyndysy emes, buǵan deıin ol «Bala Abaı», «Isataı men Mahambet», «Al-Farabı», «Dala oıyndary» sekildi anımatsııalyq fılmderge rejısserlik etken.