BUU Joǵarǵy komıssary Qazaqstannyń saıası reformalaryn joǵary baǵalady

JENEVA. QazAqparat - Qazaqstannyń Jenevadaǵy BUU bólimshesi janyndaǵy Turaqty ókili Janar Aıtjanova BUU-nyń Adam quqyqtary jónindegi Joǵarǵy Komıssary Mıshel Bacheletpen onlaın formatta kezdesý ótkizdi. Taraptar QR Prezıdentiniń saıası reformalardy iske asyrýyn talqylady, dep habarlaıdy QR SІM baspasóz qyzmeti.

M.Bachelet elimizdegi beıbit jınalystar, Saıası partııalar salasyndaǵy, sondaı-aq jala jabýdy dekrımınalızatsııalaýǵa qatysty saıası reformalaryn atap ótti.

Óz kezeginde, Turaqty ókil 2020 jyldyń aqpan aıynda BUU Adam quqyqtary jónindegi keńesiniń 43-shi sessııasy barysynda Qazaqstanda júrgizilgen reformalarǵa oń baǵa bergeni úshin, sondaı-aq Joǵarǵy Komıssar Keńsesiniń jaqynda jarııalaǵan 2019 jylǵy baıandamasynda kórsetilgen jobalar men trenıngterdi iske asyrý arqyly kórsetiletin kómek úshin Joǵarǵy komıssarǵa alǵysyn bildirdi.

Prezıdent Qasym-Jomart Toqaevtyń saıası básekelestik pen plıýralızmniń kóppartııalyq júıesin damytýǵa, sondaı-aq Qazaqstandaǵy konstıtýtsııalyq zań deńgeıinde alǵash ret usynylatyn parlamenttik oppozıtsııa tujyrymdamasyn ilgeriletýge baǵyttalǵan bastamasyna nazar aýdaryldy.

Joǵarǵy Komıssar, sondaı-aq memlekettiń azamattyq qoǵammen qarym-qatynasyn nyǵaıtý maqsatynda Qazaqstannyń júrgizip otyrǵan jumysymen tanysty.

Kezdesý sońynda QR Turaqty ókili Qazaqstan men BUU arasyndaǵy yntymaqtastyǵy sharttyq organdar, arnaıy rásimder jáne Uıymnyń basqa da tetikteri arqyly ashyq jáne konstrýktıvti dıalog arqyly iske asyrylýynyń mańyzdylyǵyn atap ótti. Sonymen birge, ol BUU-nyń sharttyq organdar júıesin onyń tıimdiligin arttyrý jáne ońtaılandyrý jónindegi reformalar bastamasyn qoldaıtyndyǵyn bildirdi.