BUU Jenevada ótetin sırııaaralyq kelissózder kúnin atady

ASTANA. QazAqparat - BUU-nyń Jeneva keńsesi sırııaaralyq kelissózderdi bastaý úshin 23 aqpanǵa daıyndalýda. Degenmen, kelissózder ótetin kún taǵy da keıinge shegerilýi múmkin. Bul jaıynda BUU Jeneva keńsesiniń baspasóz hatshysy Alessandra Velýchchı brıfıng barysynda jýrnalısterge málim etken, dep habarlaıdy Reseıdiń Jańalyqtar agenttigi.

«Eger men 100 paıyzdyq senimdilikpen aıtar bolsam, onda lotereıadan da utar edim. Degenmen, qazirgi sáttegi stsenarıı - 23 aqpan. Eger qandaı da bir ózgerister bolsa, biletin bolamyz. biraq, ázirshe munyń ózgeriske ushyraıtyndyǵy jaıynda eshqandaı nusqaýlyq túspedi», - dedi ol.

Velýchchı BUU keńsesi Uıym ǵımaratyn kelissózder ótkizýge daıyndaý jumystarynyń júrgizilip jatqanyn aıtty. Alaıda, onyń sózine qaraǵanda, áli de bolsa kelissózderdiń ótetindigi naqtylanbaǵan. Sondyqtan ózgerister oryn alýy da yqtımal.

«Qazirgi ýaqytta bizde shaqyrýdyń jiberilgendigi týraly naqty aqparat bar. delegatsııalardyń bir bóliginiń jasaqtalǵandyǵyn da estip otyrmyz. Bizde shek bar. Sol shek aıasynda jumys isteımiz. Biraq, bul protseste kez kelgen jaıt oryn alýy múmkin», - dedi ol.

Aıta keteıik, Jeneva kelissózderine deıin 15-16 aqpan kúnderi sırııaaralyq problemany sheshýge arnalǵan kezdesý Astanada ótedi. QR Syrtqy ister mınıstri Qaırat Ábdirahmanovtyń aıtýynsha, elordadaǵy kezdesý barysynda Sırııadaǵy soǵys qımyldarynyń doǵarylýyn qadaǵalaý jedel tobyn qurý týraly qujat qabyldanýy múmkin.

«Bizde ótetin kezdesý aqpan aıynda Jenevada ótetin kelissózderge daıyndyq sanalady. Biz Astanada tek tuǵyrnama usynyp otyrmyz. Ózderińizge málim, kezinde Reseı prezıdenti Pýtın men Túrkııa prezıdenti Erdoǵan Elbasymyzǵa usynys jasady. Elbasy olardyń usynystaryn qoldady  jáne 23-24 qańtar kúnderinde bizde Sırııadaǵy jaǵdaıda retteý jónindegi kezdesý uıymdastyryldy. Odan keıin jýyrda ózderińizge belgili tehnıkalyq kezdesý ótti. Al erteń ótetin kezdesý odan da joǵary deńgeıde bolmaq», - degen edi mınıstr.