BUU terrorızmge qarsy kúreste kúsh biriktiredi – joǵary deńgeıdegi Dýshanbe konferentsııasy

DÝShANBE. QazAqparat - BUU terrorızmge qarsy kúreste kúsh biriktiredi. Bul týraly Dýshanbede ótken «Terrorızmge qarsy kúres jáne terrorısterdiń transshekaralyq qozǵalysyn boldyrmaý maqsatynda shekara qaýipsizdigi jónindegi halyqaralyq jáne óńirlik yntymaqtastyq» taqyrybyndaǵy joǵary deńgeıdegi konferentsııada aıtyldy, dep habarlaıdy QazAqparat.

Sharaǵa BUU múshe elderdiń syrtqy saıası vedomstvolarynyń basshylary men halyqaralyq uıymdardyń jetekshileri qatysty. Qazaqstan delegatsııasyn Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi bastap bardy.

Konferentsııany Tájikstan Prezıdenti Emomalı Rahmon saltanatty túrde ashty.

«M.Tileýberdi transshekaralyq táýekelder men qaýip-qaterlerge qarsy kúres boıynsha birlesip jumys isteýge, sondaı-aq terrorızmge qarsy is-qımyl kontekstinde óńirlik jáne jahandyq deńgeıdegi is-qımyldardy odan ári tyǵyz úılestirýge shaqyrdy.

Mınıstr AÓSShK 6-shy sammıtiniń qorytyndysy týraly jáne BUU Jahandyq terrorızmge qarsy strategııasyn iske asyrý jónindegi AÓSShK is-qımyl josparyn bekitý týraly habarlady», - delingen QR Syrtqy ister mınıstrliginiń málimetinde.

Sondaı-aq forým aıasynda QR SІM basshysy BUU jáne EO delegatsııalarynyń basshylarymen ekijaqty kezdesýler ótkizdi. BUU Bas hatshysynyń orynbasary – Kontrterrorızm basqarmasynyń basshysy Vladımır Voronkovpen bolǵan júzdesý barysynda BUU Jahandyq terrorızmge qarsy strategııasyn Qazaqstan men Ortalyq Azııa elderinde ári qaraı iske asyrý máseleleri talqylandy.

EO Ortalyq Azııa boıynsha arnaıy ókili Terı Hakalamen kezdesýde Qazaqstan men Eýropalyq odaq arasyndaǵy yntymaqtastyqtyń negizgi baǵyttary boıynsha pikir almasyldy, sondaı-aq Eýroodaqtan keletin delegatsııalardyń Astanaǵa aldaǵy saparlarynyń kestesi qaralǵan.

Foto : gov.kz