BUU: Sırııadaǵy jaǵdaı rettelmese, bosqyndardyń sany eki nemese úsh ese artýy múmkin

ASTANA. 11 naýryz. QazAqparat - Bıyl Sırııadaǵy qaqtyǵystar toqtamasa, elden qashqan bosqyndardyń sany eki nemese úsh esege deıin ósýi múmkin. Bul jaıynda BUU-nyń bosqyndar jónindegi joǵarǵy komıssary Antonıý Gýterresh málimdedi.

muslim.kz saıtynyń jazýynsha, Túrkııaǵa jasaǵan is-sapary barysynda Gýterresh atalǵan problemanyń aýqymy jaıynda sóz qozǵady. Onyń aıtýynsha, Sırııadaǵy qantógis ary qaraı jalǵasa berse, Taıaý Shyǵys elderinde naǵyz áleýmettik «jarylys» ornaıtyn kórinedi.

BUU málimeti boıynsha, sońǵy eki jylda Sırııadaǵy qaqtyǵystardan 70 myńǵa jýyq adam kóz jumǵan. Taǵy mıllıonnan astam azamat bas saýǵalap, shekara asyp ketken eken. Gýterresh osyǵan oraı álemdik qaýymdastyqty Túrkııa, Lıvan, Iordanııa elderine qolushyn sozýǵa shaqyrdy. Óıtkeni, sırııalyq bosqyndardyń negizgi bóligi atalǵan memleketterge qonys aýdarýda.

Sondaı-aq, Grekııa bıligi de Sırııadaǵy bosqyndardyń el aýǵamyna ótip, odan ary Eýroodaq elderine taraýy múmkin ekendigin aıtyp, alańdaýshylyǵyn bildirdi.