BUU: Sırııadaǵy 16 mıllıon adam gýmanıtarlyq kómekke muqtaj

<p>ASTANA. KAZINFORM &mdash;&nbsp;Birikken Ulttar Uıymynyń baspasóz hatshysy Stefan Dıýjarrık Nıý-Iorktegi shtab-páterinde ótken baspasóz máslıhatynda qazir Sırııada 16 mıllıonnan astam adamnyń gýmanıtarlyq kómekke muqtaj ekenin aıtty. Bul týraly <a href="https://news.un.org/zh/story/2024/12/1134201" target="_blank" rel="noopener">BUU</a> baspasóz qyzmeti málim etti.</p>

Sonymen qatar, uıymnyń baspasóz hatshysy azyq-túlik jáne sanıtarlyq-gıgıenalyq zattardyń tez arada qajet ekenin atap ótti.

Sondaı-aq, Stefan Dıýjarrıktiń aıtýynsha, keıbir azamattyq múlikter men zaýyttar, gýmanıtarlyq zattardy saqtaıtyn qoımalar talan-tarajǵa túsken. Ol qıyndyqtar men turaqsyz jaǵdaıǵa qaramastan, Birikken Ulttar Uıymy men onyń seriktesteri shuǵyl kómek kórsetýdi jalǵastyratynyn atap ótti.

Qazirgi ýaqytta Sırııanyń soltústik-batysyndaǵy, Idlıb pen Alepponyń soltústik oblystaryndaǵy barlyq gýmanıtarlyq uıymdar jumysyn qaıta jandandyrdy. Birikken Ulttar Uıymy Túrkııadan Sırııaǵa kómek jetkizý úshin paıdalanǵan úsh shekara beketi áli ashyq. BUU Sırııanyń soltústik-shyǵysynda jaqynda Aleppodan qashyp kelgen adamdarǵa kómek kórsetip jatyr. 

Soltústik-batysta jumysyn toqtatqan barlyq 24 densaýlyq saqtaý mekemesi jumysyn qaıta bastady.

Birikken Ulttar Uıymy barlyq tarapty mıllıondaǵan sırııalyq bosqyndardyń otandaryna aman-esen oralýy úshin tıimdi qoldaý kórsetýge shaqyrady.

Eske salsaq, Máýlen Áshimbaev BUU Bas hatshysy Antonıý Gýterrıshpen kezdeskeni habarlandy.