BUU sarapshysy: «Jýsan» operatsııasy - basqa memleketterge úlgi

NUR-SULTAN. QazAqparat - BUU-nyń adam quqyqtaryn jáne irgeli bostandyqtaryn ilgeriletý men qorǵaý jónindegi arnaıy baıandamashysy Fıonnýala Nı Aoleın Qazaqstannyń Sırııa men Iraktaǵy janjal aımaǵynan óz azamattaryn qaıtarý bastamasyn ózge elderge úlgi etti, dep habarlaıdy QazAqparat tilshisi.

Búgin BUU táýelsiz sarapshysy Fıonnýala Nı Aoleın Qazaqstanda bolǵan 8 kúndik resmı saparynyń alǵashqy qorytyndylaryn jarııalady. BUU ókili Qazaqstanda lańkestik pen terrorızmge qarsy ulttyq zańnamanyń qalaı oryndalyp jatqanyn zerdelep, zańnyń keıbir tustaryn halyqaralyq normalarǵa saı jetildirý qajet ekenin baıqaǵanyn aıtty.

«Qazaqstan Úkimetiniń shaqyrýymen osynda 8 kúndik resmı saparda boldym. Eń áýeli Qazaqstannyń Sırııa men Irakta qalǵan azamattaryn qaıtaryp alý boıynsha qolǵa alǵan gýmanıtarlyq bastamasyn sátti joba retinde atar edim. Bul bastama arqyly sizder ózge memleketterge janjal alańyndaǵy áıelder men balalardy ákelý múmkin ekenin kórsettińizder. Ózge elder bul turǵyda Qazaqstannan úlgi alýy kerek», - deıdi Fıonnýala Nı Aoleın.

Ol, sondaı-aq, resmı sapar aıasynda jasaǵan qorytyndylary negizinde Qazaqstan aýmaǵynda lańkestik pen ekstremızm isterin tergeý, sot óndirisin júrgizý, túzetý mekemelerindegi radıkalsyzdandyrý sharalaryna reforma jasaý boıynsha birqatar usynystar daıyndaıtynyn aıtty.