BUU sarapshysy atanyp, múgedekterge qoldaý kórsetkim keledi - Vladıslav Trıfonov
Vladıslav Trıfonov qoǵamdyq jumystarǵa belsene aralasyp, erekshe kútimge muqtaj jandarǵa kómek kórsetip keledi. Ol úshin «100 jańa esimge» ený kútpegen jańalyq bolǵan.
Vladıslav Trıfonov І toptaǵy múgedek bola tura, árbir adamǵa paıdasyn tıgizýdi oılaıdy. Ol 2006 jyly erekshe kútimdi qajet etetinderdiń quqyqtaryn qorǵaý baǵytynda qoǵamdyq qor qurǵan. 10 jyldyń ishinde birneshe áleýmettik jobany júzege asyrdy.
«Rasynda múmkindigi shekteýli jandardyń máselesi qaı jerde de ózekti. Sondyqtan, osy sanattaǵy adamdarǵa kóbirek kóńil bólinýi tıis. Olarǵa qolymnan kelgenshe árqashan qol ushymdy sozýǵa daıynmyn», - deıdi ol.
Taǵdyrdyń kez-kelgen synaǵyna tóze bilý - Vladıslav Trıfonovtyń ómirlik ustanymy. Ol úzdik 100 jańa esimniń tizimine tynymsyz eńbeginiń arqasynda enip otyr. 1 jeltoqsan kúni Vladıslav úzdik ózge sala ókilderimen birge Elbasymen kezdesip keldi. Bizben kezdesýden alǵan áserimen bólisti.
«Elbasymen kezdesýde erekshe bir kúıde boldym. Bir emes, ózimdeı 100 tulǵamen tanysý jáne olarmen aıtylǵan áńgime óte áserli boldy. Forýmda Prezıdent «eger bir jerde 1 mınýt toqtap qalsań, alǵa umtylýǵa degen talpynysyń baıaýlap qalýy múmkin» degendi aıtty. Sondyqtan, men bul pikirge qosylamyn. Aıtarym, meniń de alǵa qoıǵan josparym kóp. Men halyqaralyq deńgeıge jetip, BUU-nyń múmkindigi shekteýli jandarǵa qoldaý kórsetý jónindegi sarapshysy bolýdy kózdep júrmin»-,deıdi Vladıslav Trıfonov.
Jańa jobaǵa «Qoǵam» sanaty boıynsha barlyǵy 30 tulǵa laıyq dep tanylǵan. Endi elimizdiń altyn qoryna enetin 100 tulǵanyń ishinde mańǵystaýlyq Vladıslav Trıfonov ta bar. ıAǵnı, ol - Táýelsizdik tolqynynda el damýyna eńbek sińirgen, eńbek jolymen kópke úlgi bolǵan jańa esimderdiń biri.