BUU: Pandemııa kezinde áıelder zorlyq-zombylyqqa jıi ushyraǵan

NUR-SULTAN. QazAqparat – COVID-19 pandemııasy áıelderge qatysty turmystyq zorlyq-zombylyq jaǵdaılarynyń artýyna ákeldi. Júrgizilgen saýalnama kezinde árbir ekinshi áıel ózi nemese tanysynyń otbasy múshesi tarapynan qatygezdikke ushyraǵanyn aıtty. Bul týraly BUU-nyń Áıelderge qarsy zorlyq-zombylyqty joıý boıynsha kúres kúni qarsańynda usynǵan jańa baıandamasynda jazylǵan, dep habarlaıdy QazAqparat BUU-nyń Jańalyqtar saıtyna silteme jasap.

Baıandamany «BUU-áıelder» qurylymy daıyndaǵan. Ol 13 elde ótkizilgen saýalnamaǵa negizdelgen.

Saýalnama karantın kezinde úıde qamalǵan áıelderdiń taǵy bir pandemııanyń – zorlyq-zombylyq indetiniń qurbandary bolǵanyn kórsetip otyr.
«Osy qalyptasqan keri jaǵdaıdy joıý úshin birigip kúsh jumyldyrýymyz kerek», - dedi «BUU-áıelder» qurylymynyń atqarýshy dırektory Sıma Bahýs.
Sonymen qatar zorlyq-zombylyq qurbandary psıhıkalyq jáne emotsıonaldy kúızelisten 1,3 ese jıi zardap shekkeni belgili boldy.
Árbir tórtinshi áıel pandemııa kezinde ózin ózin qorǵansyz sezingen. Onyń basty sebebi – otbasy músheleri nemese serikteriniń tarapynan kórsetilgen jynystyq jáne fızıkalyq zorlyq-zombylyq.
Saýalnamaǵa jaýap bergen áıelderdiń 40%-y pandemııa bastalǵannan bastap jalǵyz qydyrýǵa qorqatynyn málimdegen. Bes áıeldiń úsheýi qoǵamdyq jerlerde jynystyq qysym kórsetý jaǵdaılarynyń jıilegenin aıtty.
BUU-nyń Bas hatshysy áıelderge qatysty zorlyq-zombylyqty tómendetý baǵytynda tıisti sharalar jasaý qajettigin aıtty.