BUU Palestına máselesin talqylady

<p>ASTANA. KAZINFORM &ndash; BUU Qaýipsizdik keńesiniń Taıaý Shyǵystaǵy qaqtyǵysqa qatysty barlyq múshe memleketterdiń qatysýymen ótken keńeıtilgen otyrysynda BUU bas hatshysy Antonıý Gýterrısh kez-kelgen taraptyń eki memleket týraly sheshim qabyldaýdan bas tartýy úzildi-kesildi qabyldanbaýy kerektigin aıtty, dep jazady <a href="https://www.golosameriki.com/a/nations-reaffirm-urgency/7454899.html" target="_blank" rel="noopener">Amerıka daýysy.</a></p>

Antonıý Gýterrısh Izraıl-Palestına qaqtyǵysyn eki memlekettiń tirshilik etý prıntsıpi negizinde sheshim qabyldaý arqyly ǵana toqtatýǵa bolatynyn aıtty.

– Izraıldikter ózderiniń zańdy qaýipsizdik qajettilikteriniń qalaı júzege asyrylatynyn, al palestınalyqtar tolyǵymen táýelsiz, ómirsheń ári egemen memleket qurýǵa degen zańdy umtylystarynyń BUU qararlaryna, halyqaralyq quqyqqa jáne aldyńǵy kelisimderge sáıkes qalaı júzege asyrylatynyn kórýi kerek, – dedi BUU Bas hatshysy.

Palestına syrtqy ister mınıstri Rııad ál-Malıkı Birikken Ulttar Uıymynyń Palestına memleketin moıyndaıtyn ýaqyty kelgenin aıtty.

– 75 jyl buryn Izraıldi Birikken Ulttar Uıymyna qabyldaǵan kezde biz veto quqyǵyna ıe bolmadyq. 75 jyldan keıin Izraıldiń Palestına memleketin qabyldaýǵa veto quqyǵy joq,-dedi Rııad ál-Malıkı.

Ondaǵan jyldarǵa sozylǵan Taıaý Shyǵystaǵy qaqtyǵysty talqylaý maqsatyndaǵy iri kezdesý BUU Qaýipsizdik Keńesinde jylyna tórt ret ótedi jáne barlyq múshe elderdiń qatysýy úshin ashyq.

Bul kezdesýde 50-den astam eldiń syrtqy ister mınıstri sóz sóıleıdi dep josparlanǵan.