BUU Ózbekstan arqyly Aýǵanstanǵa gýmanıtarlyq kómek jiberedi

TAShKENT. QazAqparat – BUU Bosqyndar isi jónindegi joǵary komıssary basqarmasy (BJKB) Aýǵanstanǵa Ózbekstan arqyly gýmanıtarlyq kómek jiberedi, dep habarlaıdy QazAqparat menshikti tilshisi BUU saıtyna silteme jasap.

BJKB ókili Babar Baloh basqarmanyń júzdegen myń ishki qonys aýdarýshylarǵa qoldaý kórsetý úshin Aýǵanstanmen shekaralas elderde logıstıkalyq ortalyqtar qurý maqsatynda jumys istep jatqanyn aıtty.

«Taıaý ýaqytta BJKB Ózbekstannyń Termez qalasyna gýmanıtarlyq kómek artylǵan úsh ushaqty jiberedi. Keıin ony «Haıraton» shekaralyq ótkizý beketi arqyly Mazarı-Sharıfqa jetkizedi. Birinshi ushaq Termezge qazannyń ortasynda keledi», - dep habarlady BUU ókili.

Onyń aıtýynsha, qoldaýǵa muqtaj aýǵandyqtar sany 20 mln adamǵa jetken jáne ol kún saıyn artyp jatyr. Qazirgi ýaqytta aýǵandyq otbasylardyń tek 5%-y azyq-túlikpen qamtylǵan, Aýǵanstandaǵy 5 jasqa deıingi balalardyń jartysynan kóbi tamaqty toıyp ishe almaı júr jáne ashtyq aldynda tur.

Mádıbek Jánibekov