BUU Órkenıetter alıansi men QazUÝ jańa jobany birlesip júzege asyrýda

ASTANA. QazAqparat - «Іzgilikti qoǵam azamattaryn qalyptastyrý» jobasy yntymaqtastyq týraly qol qoıylǵan memorandým aıasynda júzege asyrylatyn bolady. Bul týraly kelisimge BUU Órkenıetter alıansiniń Joǵary ókili Nasır Abdýlazız ál-Naserdiń elimizdiń jetekshi joǵary oqý orny - ál-Farabı atyndaǵy QazUÝ-ǵa sapary barysynda qol jetkizilgen.

Jobanyń maqsaty - óskeleń urpaqqa beıbitshilik, jaqsylyq jáne ádilettik ıdeıalaryn jetkizý. Onyń negizi Shyǵystyń uly oıshyly ál-Farabıdiń izgilikti qoǵam týraly ıdeıasy arqyly qalandy.

QazUÝ-da sóılegen sózinde: «Zamanaýı ýnıversıtetterdiń mıssııasy - jalpy órkenıettik adamgershilik qundylyqtardy qoǵamnyń bolashaq azamattarynyń boıyna sińirý negizinde bilim berýdiń jahandyq maqsattaryna qol jetkizý. Ultymyzǵa jáne dinimizge qaramastan biz daý men óshpendilikten arylyp, jaqsy ómirge qol jetkizý úshin bar kúshimizdi biriktirý kerekpiz», - dedi Nasır Abdýlazız ál-Naser.

 

 «Tárbıesiz berilgen bilim - adamzattyń qas jaýy, ol keleshekte onyń ómirine opat ákeledi» - degen ál-Farabı sózi búginde asa ózekti. Eger joǵary oqý oryndarynyń túlekteri kásibı quzyrettilikpen qosa joǵary adamgershilik qundylyqtarǵa ıe bolsa, onda álem jaqsyraq ári qaýipsiz, ál-Farabı aıtqandaı, izgi bolady», - dep atap ótti BUU Órkenıetter alıansiniń joǵary ókilimen kezdesý barysynda QazUÝ rektory Ǵalym Mutanov.

Ýnıversıtette jastardy rýhanı-adamgershilikke tárbıeleý baǵytynda júıeli jumystar júrgizilýde. QazUÝ tehnologııalyq jáne rýhanı-adamgershilik tuǵyrnamasy negiz bolǵan «Al-Farabi University smart city» modelin daıyndap, engizýde. Bul qyzmettegi basty baǵdar jańa jahandyq shynaıylyq pen órkenıettiń damýy jaǵdaıynda ulttyq sananyń ózgerýi jónindegi Elbasy Nursultan Nazarbaev alǵa qoıǵan memlekettik baǵdarlama bolyp tabylady.