BUU operatsııalarynda UQShU kúshterin qoldaný tártibi aıqyndaldy

Búgin Senattyń jalpy otyrysynda «2007 jylǵy 6 qazandaǵy Ujymdyq qaýipsizdik týraly shart uıymynyń bitimgershilik qyzmeti týraly kelisimge ózgerister engizý týraly hattamany ratıfıkatsııalaý týraly» Zańy maquldandy, dep habarlaıdy QazAqparat tilshisi.

Hattamaǵa 2021 jylǵy 16 qyrkúıekte Dýshanbe qalasynda Ujymdyq qaýipsizdik keńesiniń otyrysynda qol qoıyldy. Qujattyń maqsaty - UQShU múshesi sanalmaıtyn memleketterdiń aýmaqtarynda Birikken Ulttar Uıymynyń beıbitshilikti saqtaý jónindegi operatsııalarynda UQShU bitimgershilik kúshterin qoldaný tártibin aıqyndaý. Hattama aıasynda «úılestirýshi memleket» degen uǵymy engiziledi.

«Qoldanystaǵy normatıvtik–quqyqtyq aktige, bitimgershilik týraly kelisimge hattama arqyly túzetýler engizý bitimgershilik qyzmetiniń quqyqtyq negizderin odan ári jetildirýge baǵyttalǵan. Máseleni retke keltirý barysynda halyqaralyq uıymdardyń bitimgershilik operatsııalaryna qatysa almaıtyndyǵy anyqtaldy. Osyǵan baılanysty uıym músheleriniń biri úılestirýshi memleket retinde áreket etedi, al qalǵandary qajet bolǵan jaǵdaıda oǵan qosyla alady degen sheshimge keldi. Ujymdyq qaýipsizdik týraly shart uıymyna múshe emes memleketterdiń aýmaqtarynda Birikken Ulttar Uıymy bastamasymen júrgiziletin bitimgershilik operatsııalarynda UQShU bitimgershilik kúshterin qoldaný tártibi naqty aıqyndaldy. Úılestirýshi memleket mártebesi Ujymdyq qaýipsizdik týraly shart uıymynyń Qaýipsizdik Keńesiniń sheshimi boıynsha kez kelgen múshe memleketke berilýi múmkin», - dedi senator Ǵalıasqar Sarybaev.

Onyń aıtýynsha, Birikken Ulttar Uıymynyń bitimgershilik mıssııalaryna qatysý úshin Hatshylyqtyń maquldaýymen úılestirýshi memleketke kvota bólinedi. Kvota alǵannan keıin ǵana Ujymdyq qaýipsizdik keńesi sol eldi Úılestirýshi memleket retinde maquldaı alady. Úılestirýshi memleket Birikken Ulttar Uıymy qarajaty esebinen logıstıka, kontıngentti tasymaldaý jáne qarjylyq máseleler boıynsha ózara is-qımyl jasaıdy.

«Árbir (UQShU-ǵa múshe) memlekettiń Birikken Ulttar Uıymynyń bitimgershilik mıssııalaryna qatysýy erikti jáne qatysý dárejesin derbes sheshedi. Joǵaryda atalǵan qujat Qazaqstan Respýblıkasynyń múddelerine sáıkes keledi jáne Ujymdyq kúshteriniń jumys isteýin qamtamasyz etýge baǵyttalǵan, sondaı-aq jedel jáne ýaqytyly áreket etýge múmkindik beredi. Negizinen, Qazaqstan Respýblıkasy Birikken Ulttar Uıymynyń halyqaralyq bitimgershilik protsesine belsendi túrde qatysyp keledi jáne atalǵan hattamany ratıfıkatsııalaý bizdiń elimiz úshin mańyzdy qujat bolyp otyr. Senattyń turaqty komıtetterinen osy Zań boıynsha eskertýler men usynystar túsken joq», - dedi depýtat.