BUU operatsııalarynda UQShU bitimgerler kúshterin qoldaný tártibi belgilenbek

ASTANA. QazAqparat – Búgin Májilistiń jalpy otyrysynda «2007 jylǵy 6 qazandaǵy Ujymdyq qaýipsizdik týraly shart uıymynyń bitimgershilik qyzmeti jónindegi kelisimge ózgerister engizý boıynsha hattamany ratıfıkatsııalaý týraly» Zań qabyldandy, dep habarlaıdy QazAqparat tilshisi.

Hattamaǵa 2021 jylǵy 16 qyrkúıekte Dýshanbe qalasynda Ujymdyq keńes otyrysynda qol qoıyldy.

Hattamada Kelisimge BUU-nyń beıbitshilikti qoldaý jónindegi operatsııalarynda Ujymdyq qaýipsizdik týraly shart uıymynyń bitimgershilik kúshterin qoldaný tártibin belgileıtin ózgerister kózdeledi. Atalǵan qujat boıynsha «úılestirýshi memleket» uǵymy engiziledi. BUU-nyń beıbitshilikti saqtaý jónindegi operatsııalarynda qoldaný úshin UQShU-nyń Ujymdyq bitimgershilik kúshteri úılestirýshi memlekettiń uıymdastyrýymen qurylady.

«Úılestirýshi memleketti Keńes (Ujymdyq Qaýipsizdik Keńesi) aıqyndaıdy. Onyń maqsaty – operatsııada osy kúshterdi qoldanýdy jan-jaqty qamtamasyz etý máselesin sheshý. Bitimgershilik kúshtiń operatsııaǵa qatysýy úılestirýshi memleket pen Birikken Ulttar Uıymynyń ýákiletti bólimshesi arasyndaǵy kelisimde aıqyndalady. Memleketter osy operatsııaǵa erikti túrde qatysady. Hattamany ratıfıkatsııalaý Qazaqstan múddesine sáıkes keledi. Óıtkeni, ol Uıym men oǵan múshe memlekettiń beıbitshilik pen qaýipsizdikti qoldaýǵa, yntymaqtastyqty nyǵaıtýǵa tıimdi qatysýyn qamtamasyz etýge múmkindik beredi», - dedi Qorǵanys mınıstriniń orynbasary Sultan Qamaletdınov.

Budan buryn habarlanǵandaı, búgin Májilistiń jalpy otyrysynda «Ujymdyq qaýipsizdik týraly shart uıymynyń áskerlerin (Ujymdyq kúshterin) birlesken materıaldyq-tehnıkalyq jáne medıtsınalyq qamtamasyz etý týraly kelisimdi ratıfıkatsııalaý týraly» Zań qabyldandy.