BUU óńirlik ortalyǵynyń basshysy Qazaqstanǵa keledi

ASTANA. QazAqparat – 2-3 aqpan aralyǵynda BUU óńirlik ortalyǵynyń basshysy Natalıa German Qazaqstanǵa keledi. Bul týraly Syrtqy ister mınıstrliginiń aptalyq brıfınginde vedomstvonyń resmı ókili Aıbek Smadııarov aıtty, dep habarlaıdy QazAqparat tilshisi.

«2-3 aqpan aralyǵynda Natalıa German Ortalyq Azııa úshin Preventıvti dıplomatııasy jónindegi BUU óńirlik ortalyǵynyń basshysy retindegi mıssııasynyń aıaqtalýyna jáne BUU Terrorızmge qarsy kúres komıtetiniń atqarýshy dırektoratynyń atqarýshy dırektory laýazymyna taǵaıyndalýyna baılanysty Ortalyq Azııa elderi boıynsha qoshtasý týry sheńberinde Qazaqstanǵa keledi. Astanada QR SІM basshylyǵymen kezdesýler josparlanýda», - dep málim etti Aıbek Smadııarov.

Onyń aıtýynsha, kelissóz barysynda BUU sheńberindegi óńirlik yntymaqtastyq máseleleri talqylanbaq.

«Taraptar Ortalyq Azııa elderi men BUU Óńirlik ortalyǵy arasynda qalyptasqan kópjyldyq áriptestik pen senimge negizdelgen BUU sheńberindegi óńirlik yntymaqtastyq máselelerin, sondaı-aq Ortalyq Azııa óńirinde beıbitshilik pen qaýipsizdikti saqtaý úshin profılaktıkalyq dıplomatııa quraldaryn damytý men nyǵaıtýdy talqylaýdy josparlap otyr», - dep túıindedi vedomstvonyń resmı ókili.

Foto: ITAR-TASS/ Zurab Dzhavakhadze